Javier Silvania: tin indikashon ku finansiamentu Ennia lo bai den presupuesto. Entre 700 mion florin pa 1.1 miar.

Punda – Ku intervenshon di Konseho di Ministernan, Minister di Finansa Javier Silvania tin pensá pa entregá e proposishon di Presupuesto 2024 mas lat ku Areglo di Estado ta pèrmití. E ta preferá warda resultadonan di e negosiashonnan andando ku Hulanda pa ku refinansiamentu dje fiansa di likides di 910 mion florin i tambe pa ku posibel solushon pa e kompania di seguro Ennia ,ku tambe lo ta posibel ku fiansa di Hulanda. E Minister no ke entregá e Presupuesto balansá ku tin riba mesa awor akí, pasó e ta kontené solamente informashonnan te ku luna pasá i no resultado dje negosiashonnan menshoná ku tambe e lo ke inkluí den e Presupuesto.

Konforme artíkulo 85 insiso 3 di Areglo di Estado, mester entregá e proposishon di Presupuesto riba e di dos djamars di sèptèmber pa Parlamento trata. “Un proposishon di un Presupuesto 2024 balansá ya ta entregá na Kolegio di supervishon finansiero (Cft) i na Hunta di Konseho (RvA) pa konseho. Pero e proposishon ta trahá a base di informashonnan konosí te ku luna yüli dje aña akí. Aktualmente tin negosiashon andando ku Hulanda tokante refinansiamentu dje fiansanan di likides (na balor di 911 mion florin), finansiamentu di invershonnan duradero i solushon pa e problema ku ENNIA (posiblemente pa medio di un fiansa di Hulanda). E negosiashonnan akí ta den e fase final.”

Posiblemente lo yega na un akuerdo gubernamental ku Hulanda na fin di sèptèmber próksimo tokante refinansiamentu dje fiansanan di likides i solushon pa e problemanan finansiero di Ennia. “E ora ei e kondishonnan dje fiansanan, manera e forma di e fiansa i porsentahe di interes, lo ta konosí. E kondishonnan di e refinansiamentu i fiansa ku ainda mester finalisá (entre otro gastunan di interes) posiblemente lo tin un impakto grandi riba e proposishon di Presupuesto 2024. Den e proposishon di presupuesto 2024 aktual, e konsekuensianan dje negosiashonnan ainda no ta kalkulá. E negosiashonnan ta progresando ainda.”

E proseso pa inkorporá e efektonan dje negosiashonnan menshoná den e proposishon di Presupuesto 2024 por tuma lugá despues ku finalisá e negosiashonnan menshoná. “Esaki ta e motibu pa kua e Minister di Finansa ke pidi Parlamento pa posponé e entrega dje proposishon di presupuesto 2024. Si ta tuma e desishon pa posponé, mester tene kuenta ku RvA i Cft mester evaluá e proposishon di presupuesto 2024 adaptá ainda. Esaki por resultá den un petishon pa posponé e entrega te na fin di novèmber. Naturalmente a pidi konseho legal tokante e situashon akí. A pidi konseho di e departamentu di lei i asuntunan hudisial di Ministerio di Asuntunan General, WJZ. Den e konseho, lo tene kuenta ku leinan i reglanan aktual manera Lei di Kompatibilidat di 2010, Lei di Maneho Finansiero, nos Konstitushon i prinsipionan di bon gobernashon.”

Segun Ministerio di Finansa si ta pèrmití pa entregá e proposishon di presupuesto 2024 mas lat (na lugá di e di dos djamars di sèptèmber 2023), por inkluí e efektonan dje kondishonnan di fiansa menshoná (ku por fèrwagt na fin di sèptèmber 2023 ta konosí), inkluso posibel medidanan kompensatorio pa yega na un presupuesto balansá manera preskribí den Lei di Reino di supervishon finansiero (Rft). “Esaki ta resultá den un tratamentu efektivo di e presupuesto den Parlamento, basá riba e desaroyonan i faktornan konosí mas resien.”