SOAB: SOAB ta konkluí ku Ontvanger no ta supervisá si e medidanan di kobransa  nesesario ta wòrdu tumá na tempu.

Punda— Minister di Asuntunan Finansiero, Javier Silvania ta prekupá ku e sistema di kobransa i areglonan di pago, den pasado, na Ontvanger. E minister mediante un karta, a urgi presidente di parlamento, Charetti America pa un reunion den Komishon Sentral.

E minister a duna SOAB tarea pa investigá. Algun di e resultadonan, no tabatin bon indikashon. Por ehèmpel, pa un transportadó ku un debe di 4,5 mion florin, inkluso un òrdu di despacho di duana di 1,1 mion florin, Ontvanger a akordá un areglo di pago di 5,000 florin pa luna. Esaki miéntras ku un investigashon di kobransa hasí pa SBAB ta mustra ku e transportadó aki tin e posibilidatnan pa paga i tambe a risibí konseho di e lider di tim di kobransa spesial di e tempu ei pa hasi e gerente responsabel, i tambe pa pasa pa kobransa obligatorio. E hustifikashon di Ontvanger relashoná ku esaki no por wòrdu hañá den e fail di kobransa, segun SOAB. Tin kompanianan ku debe mas di pro ehèmpel 10 biaha mas chikí ta paga dòbel mas tantu ku e kompania en kestion.

SOAB a deskubrí tambe, un kadena di establesimentu di horeca ku un historia largu di inkumplimentu ku impuesto i primanan, a risibí na diferente okashon un areglo di pago na nòmber di Ontvanger, ku no ta den proporshon ku e debe di impuesto pendiente. Strukturalmente no ta kumpli ku e akuerdonan di pago aki. Pa un debe di OB pendiente di kasi 1 mion florin, a sera un akuerdo di pago di 2.500 florin pa luna. E empresario di horeca en kuestion, no a kumpli ku e areglo di pago aki. Seguidamente, a bolbe sera un areglo di pago nobo di 2.500 florin mensual pa un debe di 1,5 mion, ku atrobe no a  kumpli kuné.

Den un otro kaso, un provedor di servisio komersial strukturalmente no ta atministrá su  obligashonnan fiskal tantu komersial komo privá. For di 2011 a sera diferente areglo di pago ku no a kumpli kuné. E debe a akumulá yega  mas ku 1 mion florin, te Ontvanger a emití un òrdu di embargo, ku despues ta keda retené pa Ontvanger. Na nòmber di Ontvanger, ta sera un areglo di pago di 6.000 florin pa luna, ku atrobe no ta kumpli kuné. Riba instrukshon di Ontvanger, ta añadí aanslagnan nobo na e areglo di pago kada bia, miéntras no ta kumpli ku e kondishonnan di pago. Na 2022, e debe a subi te na kasi 2 mion florin.

SOAB ta konkluí ku Ontvanger no ta supervisá si e medidanan di kobransa  nesesario ta wòrdu tumá na tempu. Komo resultado, tin tambe e riesgo di vensementu di debenan di impuesto pendiente. No tin un maneho di adaptashon òf ahuste di organisashon ku ta tuma lugá dor di Ontvanger. Hustifikashon pa tuma (òf no tuma) medida di kobransa hopi bia ta falta den e fail di kobransa. Hopi biaha ta falta un kalkulashon di e kapasidat di pago pa por yega na un akuerdo di pago ku ta desviá for di e reglanan di kobransa aplikabel. Komo resultado, no por establesé e legalidat di e areglo di pago determiná.  Ontvanger ta intervení regularmente personalmente den e proseso di kobransa sin splikashon adishonal ni registrashon den e fail di kobransa.  Ontvanger no ta ehekutá un kontrol efektivo di kumplimentu ku e areglonan di pago. Mayoria di e akuerdonan di pago ku a akordá no ta wòrdu kumplí sin ku tuma e medidanan oportuno. Tin riesgo ku ta sobrepasá e términonan di pago máksimo i ku e debenan di impuesto ta keda akumulá.