Javier Silvania, Minister di Finansas.

Punda—Segun Minister di Finansas, Javier Silvania a konstatá ku den sierto kasonan na Ontvanger tabatin trato preferenshal. Rapòrtnan di SOAB ta mustra klaramente ku tin faboresimentu di algun kontribuyente, segun e minister a manda informá presidente di Parlamento.

E rapòrt di SOAB a hiba diferente konklushon. Den e karta di Silvania na Parlamento e ta menshoná ta bon pa informá  kontenido di su karta ta solamente un selekshon di e failnan di kobransa i ku e método di trata aki ta wòrdu hibá na un eskala grandi pa Ontvanger. Previo solisitut, Ontvanger ta apelá riba su ‘diskreshon’ den e proseso di kobransa. Sin embargo, esaki no ta kita balor di e echo ku e motibunan pa desviá for di e akuerdonan di rekuperashon aktual mester wòrdu registrá den e fail di kobransa. Un registrashon ku segun e ouditornan interno ta falta den kasi tur kaso. “E kobradó ta risibí solamente instrukshon di Ontvanger pa realisá e akshon relevante, sin splikashon adishonal”, segun e rapòrt di ouditoria interno. “Bo por imaginá ku esaki tin un efekto hopi demotivante riba e kobradónan i deurwaardernan benevolente ku ta ehekutá nan trabounan di kobransa di bon fe”, e minister a sigui menshoná.

E minister a sigui menshoná tambe e rapòrtnan di SOAB ta mustra ku diferente resultado ta keda ripití pa añanan konsekutivo, sin ku esaki a hiba na implementashon di akshonnan di mehorashon. Na lugá di esaki, ta duna (konforme e reakshon di Ontvanger riba e rapòrtnan di SOAB), komo ‘splikashon’ e kandela na 2019, e mudamentu ku a tuma lugá despues i e pandemia di COVID.   E minister a hasi apelashon na presidente di parlamento pa tuma bon nota di e resultadonan impaktante den e rapòrtnan athunto. Pa por duna e informashon nesesario na komunidat, Silvania ta pidi amablemente pa yama un reunion di komishon sentral.