Javier Silvania, minister di finansas

Punda— Ainda tin bastante depósito riba kuentanan intermediario na Ontvanger. Apesar ku Ministerio di Finansas via di Kaha Nashonal ta tratando na solushon e problema, tin bankonan lokal ku ainda no ta kompletamente outomatisá.

Algun banko a risibi, den pasado, un karta di Ontvanger ku nan deseo pa prosesá e rekuentonan bankarionan outomátikamente.  Den e karta alabes Ontvanger a stipulá e kondishonnan bou di kua e archivonan i data mester kumpli. SOAB ta yudando Ontvanger den e proseso aki.  E instituto estatal pa atministrashon públiko, SOAB ta birando un éksito den nan proseso di konseho na Ontvanger di Kòrsou, Kaha di Gobièrnu. SOAB ta tratando pa Ontvanger kuminsá obligá bankonan lokal di prosesá nan rekuento (afschrift) outomátiko en bes di manual. Ku eksepshon di MCB, demas bankonan ta prosesando nan rekuentonan ainda manual. 

E ofisina estatal di kompatibilidat, SOAB, ta hasiendo un bon trabou pa duna asistensha na Kaha di Gobièrnu unda nan asistensha ta enserá pa konsehá kon prosesá i atministrá transakshonnan bankario mas lihé i efisiente. Durante e proseso a bin realisá ku tin demasiado kuenta intermediario na Ontvanger. E kousa ta debí na demasiado kliente pagadó na Ontvanger no ta duna bon deskripshon di nan pago. Konsekuentemente, no por determiná por ehèmpel kua impuesto e kliente a paga i den kua periodo.  Te ainda segun SOAB, no ta tur banko a reakshoná riba petishon di Ontvanger. Orco Bank, FCIB i Vidanova a konfirmá di lo adaptá nan sistema di manual pa outomátiko, miéntras RBC a informá ontvanger ku n’e momentonan aki nan tin otro prioridat. Pa por logra outomatisá, mester bini un FTP Server nobo i mas grandi.