WILLEMSTAD – Den un karta skèrpi dirigí na direktiva di Fondo di Penshon general Kòrsou (Algemeen Pensioenfonds Curaçao, APC), Minister di Finansa Javier Silvania a ekspresá su preokupashon tokante e fayo resientemente deskubrí den kalkulashon di penshon di inkapasidat (“invaliditeitspensioenen”). E karta, dirigí na Evelyn Kruithof-Bor, ta enfatisá e seriedat dje situashon i ta lansa diferente pregunta (dje Minister) tokante responsabilidat, medidanan korektivo i pasonan preventivo pa futuro. E Minister ke sa entre otro si APC tin intenshon di kobra e plakanan pagá dimás na penshon bèk.

For di 2016 ta resultá ku e kalkulashon dje penshon di inkapasidat tabata inkorekto, resultando den un grupo di penshonado inkapasitá ku a risibí muchu mas tantu plaka na penshon ku nan tabatin derecho riba dje. Asina e Minister di Finansa a komprendé di notisianan den medionan di komunikashon. Aktualmente APC ta den diálogo ku e grupo akí pa koregí e situashon, pero e konsekuensianan pa e penshonadonan ta signifikante. Minister Silvania ta lamentá e impakto negativo riba bida di e penshonadonan afektá.
Den su karta e Minister di Finansa a hasi algun pregunta klave na direktiva di APC, pa medio di Kruithof-Bor. E ke sa kon ta posibel ku e penshonnan di inkapasidat a keda kalkulá usando basenan inkorekto. E Minister ta insistí riba un análisis profundo dje fayo, pa evitá ripitishon. Tambe e Minister ke sa ken ta responsabel pa e fayo akí, i kiko ta e medidanan ku lo tuma pa sanshoná esun/esnan responsabel. Silvania ta enfatisá ku un eror manera esaki, no por keda sin konsekuensia. E ke sa tambe kiko ta hasiendo pa evitá fayonan manera esaki den futuro. Minister Silvania ta eksigí un plan i medidanan konkreto pa garantisá integridat dje sistema di penshon. Silvania ke sa tambe sí ta e intenshon di APC pa rekuperá e penshonnan pagá dimás bèk. Ku otro palabra, si lo kobra e penshonadonan inkapasitá e sumanan èkstra ku nan a risibí na e penshon bèk. Silvania ta suprayá ku no tin espasio pa medidanan parsial i ku e rekuperashon mester tuma lugá di un manera profundo.
E Minister di Finansa a puntra Kruithof-Bor tambe si ta tene kuenta ku e konsekuensianan dje rekuperashon riba e sirkunstansianan sosial individual di e penshonadonan. Silvania ta insistí ku mester tuma desishonnan ku ta konsiderá e difikultatnan ku e grupo akí ta konfrontá. E grupo di penshonado ya a kustumbrá ku un sierto suma di entrada di penshon. E korekshon lo tin un impakto mas grandi ainda riba e e grupo akí, dor di e echo no a indeksá penshon e aña akí. E falta di protekshon kontra inflashon i e bahada di poder di kumpra, ta hsai e rekuperashon di e penshonnan akí ainda mas problemátiko. Den su karta e Minister ta ekspresá su preokupashon tokante e konsekuensianan sosial ku por surgi, i ta urgi APC no solamente pa koregí e fayonan, pero tambe pa trata e sirkunstansianan sosial individual di e personanan afektá ku hopi koutela. El a manda un kopia di e karta akí tambe pa Hunta di Supervishon (Raad van Toezicht) di e fondo di penshon general APC, indikando ku transparensia i dunamentu di kuenta i rason na pueblo, ta esensial den e proseso di rekuperashon. Den e periodo benidero lo wak kon APC lo reakshoná riba e kuestion urgente akí i kon lo kompensá e penshonadonan pa e fayonan kometé.•