Willemstad—–Djawebs 13 aprel 2023, personal di Duana Kòrsou den diálogo ku e dos sindikatonan STRAF i ABVO a pone trabou abou, pasobra nan ta di opinion ku no ta tuma nan na konsiderashon den e deliberashonnan tokante di nan posishon hurídiko.

 Hefe interino di Servisio di Duana a papia ku un delegashon parti mainta. Despues, a tuma lugá un kòmbersashon bilateral entre e maneho di Duana i Minister di Finansa. Esaki a trese klaridat riba algun aspekto relashoná ku e personal. Ta trata di e siguiente puntonan, esta:

1. Minister a firma 44 petishon di hubileo di funshonario. Konforme e prosedura regular e dokumentonan a wòrdu mandá pa e departamento di SSO di Ministerio di BPD, pa nan  wòrdu finalisá.
2. A trata 11 petishon pa promoshon di e grupo di funshon di Kòmis di eskala 5 pa eskala 6, i esakinan ta den fase di otorgashon.
3. Tur e dokumentonan ta wòrdu mandá pa Minister dia 14 di aprel, ku e petishon pa promové tur e 24 miembronan di personal ku ta den e grupo di funshon di Kòmis di eskala 6 pa eskala 7. Despues ku Minister di Finansa aprobá e petishonnan e trayekto lo kontinuá i e tèst di HRO i e tèst finansiero lo tuma lugá.
4. Pa loke ta trata e supsidio di disponibilidat, manera stipulá den LB 2010 no. 69, maneho nobo mester wòrdu trahá den kolaborashon ku E&Y i e grupo di trabou di Duana. Pa trata esaki tin mester di un término di 6 luna.
5. E sindikato a hasi petishon na maneho di Duana pa promové 8 kolaborador ku ta den e grupo di funshon di Kòmis pa e grupo di funshon di Hefe di Kòmis. Sin embargo, e landsbesluit 2010 no. 69 artíkulo 16 insiso 1 ta skirbi:

“Esun ku terminá e estudio di Hefe di Kòmis ku éksito, lo wòrdu nombrá den e grupo di funshon di Hefe di Kòmis, e promé dia di e luna despues ku el a finalisá e estudio ku éksito. Sin e estudio finalisá no ta posibel pa hasi un nombramentu den e grupo di funshon di Hefe di Kòmis.”

Maneho di Duana lo trata di kompensá e kolaboradornan aki pa nan esfuerso denter di e posibilidatnan ku lei i reglamentashonnan ta brinda.

6. Pa loke ta trata e kompensashon di supervishon, esaki tin e atenshon nesesario di maneho di Duana. Djaluna maneho di Duana lo trata e tópiko aki ku e dos sindikatonan.

Ku esaki Minister di Finansa ta spera di a duna mas klaridat tokante di e asuntunan relashoná ku e posishon hurídiko di e kolaboradornan; A palabrá ku Maneho di Duana pa sinta kada 6 luna ku e sindikatonan tokante di asuntunan di duana. E promé enkuentro ta planiá pa djaluna 17 di aprel, 3’or di atardi.