George Hernandez, CGTC huntu ku Wendell Meulen, SSK.

Veeris—E sentralnan sindikal, CGTC huntu ku SSK ta teme emigrashon di hopi penshonado na Ennia pa Hulanda. Esaki lo sosodé si mester devaluá nan penshun na 50%.

Tantu sekretario general di CGTC, George Hernandez komo Wendell Meulen di SSK a konfirmá un emigrashon si akaso e penshunnan devaluá. Na e momentonan aki, Ennia Caribe Leven ta pagando por lo ménos un suma mensual di kasi 3.5 mion na penshonadonan. Ta trata di pagonan di entre 600 pa mas haltu ku 2 mil florin mensual. E pagonan na penshonado komo kota mensual ta totalisá 3.5 mion repartí riba alrededor 4.500 penshonado ku ta kobrando aktivo mensualmente. E grupo mas grandi, 60% di e penshonadonan ta kobra entre 0 pa 600 florin mensual. Ta trata di un pago kolektivo di kaso 900 mil florin ku ta representá e 60%. E grupo di penshonado ku ta kobrando mas tantu sèn ta un kantidat di 290 penshonado kobrando riba 2 mil florin mensual. Ta trata di un pago kolektivo di kasi 1 mion florin, ku Ennia mester hasi na e penshonadonan.