Silvania

WILLEMSTAD – Riba petishon di Minister di Finansa Silvania na yanüari último, Parlamento e siman akí a motivá nan petishon pa kaduká e prinsipio di solidaridat di artíkulo 46 dje ordenansa ‘Landsverordening geldelijke voorzieningen leden en gewezen leden van de Staten’.

Ta trata akí dje artíkulo ku ta regla un deskuento di 25% riba nan salario. Nan a pidi gobièrnu pa anulá esaki i debolbé nan e porsentahe akí, ya ku e situashon finansiero di pais despues dje krísis okashoná pa e pandemia di COVID-19, ta rekuperando.

Ya gabinete Pisas 2 a anunsiá e intenshon pa anulá e deskuento salarial entrante 1 di yüli dje aña akí mes, i Parlamento a tuma nota dje anunsio. Nan ta di akuerdo ku e desishon akí i a motivá esaki splikando ku ya e pandemia di COVID-19 ta sufisiente bou di kòntròl, i ekonomia ta rekuperando. “E situashon finansiero di Pais Kòrsou ta asina restourá ku no tin nesesidat mas pa mantené e prinsipio di solidaridat. A tene kuenta ku kualke eventual suavisashon dje kondishonnan laboral den e presupuesto di término largu. Pais Kòrsou no a pidi sosten di likides na Hulanda den 2022. Ademas e presupuesto di aña di servisio 2023 ta den balansa, konforme e normanan finansiero establesé den e ordenansa ‘Landsverordening comptabiliteit 2010’ i e lei di Reino ‘Rijkswet financieel toezicht Curaçao en Sint Maarten’.”

Ku e motivashonnan akí Parlamento a pidi Minister Silvania pa entregá e dekreto ku ta enserá anulá e artíkulo 46 dje ordenansa menshoná na gobernador Lucille George-Wout. I ta eksaktamente loke e Minister a hasi entretantu kaba. Ela anunsiá e siman akí ku despues ku ela firma e konsepto dje dekreto ku ta hasi e anulashon posibel, ela manda esaki pa gobernador firma. Despues ku publiká e dekreto e anulashon dje deskuento salarial ta bira un echo.

Manera Vigilante a informá aña pasá, gabinete Pisas 2 ya a indiká den e Presupuesto Suplementario 2022 di tin e intenshon di eliminá e redukshon riba e pakete total di kondishonnan laboral di Ministernan i miembronan di Parlamento por kompleto entrante 1 di yüli 2023. Esaki ta na vigor for di aña 2020 i na 2021 a formalisá esaki den e ordenansa ariba menshoná. E tabata un dje kondishonnan di Hulanda pa duna sosten di likides. Ya Gabinete Pisas 2 a disidí for di aña pasá tambe kaba ku lo eliminá esaki pa ámtenarnan i esnan di mesun rango.

Hulanda a bai di akuerdo ku e petishon pa por kuminsá eliminá e redukshon riba kondishonnan laboral, ku e kondishon di pasa e lei ku ta regla salario máksimo di funshonarionan tòp den entidatnan gubernamental. Parlamento a aprobá e asina yamá ‘Landsverordening normering topinkomens’ na fin di aña pasá, loke a bari e eksigensia di Hulanda for di mesa.