E investigashonnan hasí a laga mira e problema serio.

CARACAS – E skarsedat di materialnan médiko ta subi i alkansá un 74% den salanan di operashon di e sistema públiko di salú na Venezuela. Esaki segun e enkuesta mas resien di Enkuesta Nashonal di Hospitalnan apliká na luna di yüni i publiká den oranan di djabièrnè pa ONG Médiko pa Salú. Esaki sin presisá e number di sentro òf estadonan den kua a realisá e sondeo.

Segun e informe di e organisashon no gubernamental, durante luna di yüni, a registrá ku na e prinsipal sentronan hospitalario di e pais, tin un fayo den 74% pa sala di operashon i 34% pa emergensia.

Segun e enkuesta, loke falta ku mas frekuensia den salanan di operashon ta e paña di kama i bistimentu spesial pa e personal médiko. Esaki miéntras ku den salanan di emergensia, e fayo nan prinsipal ta e remedi nan pa baha preshon, inhaladó di asma i steroids.

E resultadonan di e monitoreo ta ekspresá e gran karensia di hospitalnan venezolano, ku ademas, ta obligá pashènt i famianan di paga tur gastu di insumo di nan propio saku. Esaki pa asina nan por keda atendé.

A agregá ademas, ku pa realisá e informe; a verifiká eksistensia òf no di nuebe material indispensabel den sala di operashon i otro 20 insumo primordial di sala nan di emergensia.

Den un informe anterior, publiká dia 23 di mart último, “Médiko pa Salú” a indiká ku problema ku e insumo nan den sala di operashon di sentro nan médiko na yanüari pasá tabata di 72%.

Den 2018, personal sanitario a kuminsá apliká e kòntròl nan na sentronan hospitalario di vários siudat, ku e ophetivo di identifiká e kondishonnan di e sistema di salú. Esaki mirando e silensio gubernamental pa ku e tema.