E situashon aki a inisiá for di 2019 bin ariba.

CARACAS – E skarsedat di remedi na Venezuela tabata di un 25.9% den luna di yüni. Esaki segun un boletin publiká djadumingu pa ONG Convite, kua ta hasi un siguimentu den disponibilidat i akseso na esaki nan na Caracas i otro 16 siudat di henter e pais.

Segun e organisashon, e investigashon a indiká ku di kada 10 botika bishitá, solamente un òf dos tabata haña e medikamentu nan aki.

A señalá ku e tendensia aki ta keda mantené, di tin skarsedat, sinembargo el a sigurá ku aunke den e promé semèster di aña tabatin evidensia di un mayor disponibilidat, esaki no a keda mirá den akseso di tratamentu nan.

Mas aleu a indiká ku e estudio a keda hasí pa e remedi nan mas utilisá den seis kousa, manera entre otro konvulshon, infekshon respiratorio agudo, depreshon, diabétis, tenshon i diarea.

Esun ku mas tin skarsedat di dje ta pa diabétis, ku registro di 33.5%, siguí pa infekshon nan respiratorio agudo ku un 32.5% i konvulshon ku 32.3%.

Mas aleu a señalá ku na e siudat nan ku mas a registrá ousensia di e medikamentu nan aki durante luna di yüni ta San Juan de los Morros, estado di Guárico, ku 52.6% i Caracas, ku un 38.4%.

Venezuela a biba aña nan di skarsedat generalisá ku a inisiá na 2018, despues di falta di remedi i kuminda, superior na 80%.