ORANJESTAD – Den un sentensia resien remarkabel di Korte Komun di Hustisia di Aruba, Kòrsou, St. Maarten i islanan BES (Hof) a tuma un desishon ku ta sobresalí den kasonan di derecho laboral. E skol sekundario Stichting Voortgezet Onderwijs Aruba (SVOA) a kita un dosente for di trabou ku tabata inkapasitá pa traha (AO). Pero Hof a anulá e retiro, debí ku e dama ta(bata) sufri di depreshon posnatal.

E 3 huesnan di Hof a para ketu na e pregunta si e retiro ta violá e prohibishon legal di retiro relashoná ku embaraso. E dama tabata traha komo asistente tékniko na e skol di enseñansa sekundario na Aruba. Tabatin diferente tratamentu di petishonnan den e kaso akí. E dama a hasi un apelashon riba e prohibishon legal di retiro reglá den artíkulo 7A di e Kódigo Sivil bieu i a usa esaki komo base di su ponensia ku e retiro ta nulo.

Den un sentensia anterior dje aña akí, Hof a disidí ku un pèrmit di retiro no tabata nesesario. Pero awó den e desishon final, Hof a deklará e retiro nulo, debí na presunto violashon dje prohibishon di retiro relashoná ku embaraso. Hof den e sentensia final ta tene kuenta hopi ku e sirkunstansianan personal dje trahadó, spesialmente su salú i tambe e momentu di e retiro. Hof a konstatá ku e tabata inkapasitá pa traha durante un periodo signifikante di su ferlòf di embaraso. Hof a konkluí ku esaki tabata relashoná ku un depreshon posnatal, ku na su turno tabata relashoná ku e periodo di embaraso mes. Esaki a kondusí na e desishon ku e retiro tabata kontra e prohibishon di retiro legal.

E sentensia akí ta remarkabel i ta ilustrá ku Hof a para ketu na e importansia di derechonan di trahadónan spesialmente durante di e periodonan di su ferlòf di embaraso. Hof a konfirmá e sentensia anterior di Korte di Aruba i a deklará e retiro nulo. Komo konsekuensia di esaki Hof a kondená SVOA na paga e gastunan di e prosedura den apelashon, kalkulá na 6 mil florin pa abogado dje dama.