DEN HAAG—Ministerio di defensa a deskubrí aña pasa software di spionahe den e sistema di kompiuter di forsanan armá.

Segun servisio di Seguridat i Inteligensia Militar ta trata di un programa avansá instalá pa un instansha estatal chines. E programa (Coathanger) a keda deskubrí riba un netwerk den e servisio ku ta usa pa Research and Development (R&D). Pasobra e tabata un sistema riba su mes e no a kousa dañona e ret di Defensa, segun MIVD. E ret tabata konta ménos ku 50 usuario. Segun un eksperto den seguridat sibernetiko Maasland e impakto a kousa poko daño: pero ta trata di intenshon di un atake sibernetiko. China tin e brutalidat pa hack hasta nos ministerio di Defensa. MIVD ta kla ku e asuntu i ta pone China na palu di berguensa. Servisio di inteligensia a publiká un raport tékniko di e modus operandi di hackers estatal chines. Riba website di sentro di seguridat nashonal NCSC a pone e karakteristikanan di e software di spionahe. Ta trata di programa ku ta usa den sistemanan (FortiGate) di e kompania Fortinet. Ku e sistema aki usuarionan di kompiuter por traha safe ku protekshon na distansia. Segun MIVD e chinesnan a hasi uso di e vulnerabilidat di e aparatonan den FortiGate. E vulnerabilidat ta data di 2022 i por a resolve ku instalashon di un update. Ministerio di Defensa no a hasi esaki.