WILLEMSTAD – Minister di Enseñansa, Siensia, Deporte i Kultura (ESKD) Sithree “Cey” van Heydoorn ta trahando riba un maneho di término largu pa bringa kalor na skol. Pero riba término kòrtiku e Ministerio i skolnan lo studia temperatura i si e subi te na 34 i 35 grado pafó di klas, ta kambia operashon dje skol òf ta sera e skol mas tempran.

Frakshon di MAN a puntra e Minister su maneho konkreto pa atendé ku e problema di kalor tantu riba término kòrtiku komo largu. Van Heydoorn: “Mi maneho ta pa tur alumno haña oportunidat pa desaroyá nan mes optimal. Esaki ta nifiká ku e kondishonnan i klima den skol mester ta adekuá pa por realisá un klima di aprendisahe optimal. Pa realisá esaki, mi ta traha den kolaborashon estrecho ku ekspertonan dje Ministerio di Salubridat pa asina tuma desishonnan adekuá pa salbaguardiá salú di tur ku ta laborá den sektor di Enseñansa.”

Riba término kòrtiku Van Heydoorn su maneho ta pa ahustá e programa di enseñansa den aliniashon ku tur aktor korespondiente, inkluso direktivanan di skolnan. Saliendo for di loke ta responsabel, ta apliká e direkshon di evaluá e temperatura i tuma akshon konsiderando e situashon den kada skol. Segun e Minister, no ta tur skol tin mesun klima. E maneho riba término kòrtiku ta ku asina e temperatura den klas subi 32 grado, gerensia di skol ta tuma medida pa akomodá e grupo i personal den otro espasio. Tambe ta asina ku si e temperatura pronostiká subi di tal forma, ku riba nivel nashonal e por subi yega temperaturanan di 34 i 35 grado pafó di klas, lo ahustá operashon di skol i si ta nesesario ta sera e skol mas tempran.

Pa término medio, Van Heydoorn ta preparando invershon, saliendo for di loke e panelnan solar instalá na skolnan a produsí te awó, pa e skolnan por mehorá e klima den skol. “Esaki ta krea mas espasio fresku di moda ku skol por kontinuá. E akshon akí lo supli tur klas ku èrko aida, pero esaki ta un fase entremedio. Pa término largu e plan ta pa suministrá mas tantu lokal posibel ku èrko, teniendo kuenta ku mantenshon i oumento struktural di gastunan.