AMSTERDAM—Un testigu den proseso di asesinato di Peter R de Vries a bisa ku sospechosonan tabatin plan pa sekuestrá premier Mark Rutte.

Esaki segun deklarashonnan di e testigu. E deklarashonnan di e testigu den protekshon, ku ta bou di e nòmber Eddy, ta hunga un ròl importante den e proseso. Eddy a bisa ku el a tende di un dje sospechosonan prinsipal den e kaso, ku ta Krystian M, ku promé ku e atentado riba De Vries, tabatin plannan pa sekuestrá Rutte. M ta keda sospechá di organisá e asesinato di e periodista investigativo Peter R de Vries. OM ta kere ku e kriminal Ridouan Taghi tambe ta envolví den e kaso. Eddy tabatin amistat ku M pero segun prensa el a bai polis pasobra su konsenshi ta remorde. M a bise ku e hendenan tras di asesinato ta fuerte i ku nan kier sekuestrá premier Rutte tambe, segun e deklarashonnan. E hendenan ta referí na tio segun Eddy. Nunka M no a bisa ken tio ta, pero el a bisa ku ta e hende tras di asesinatonan di su ruman i abogado di testigu prinsipal Nabil B, pues ta Tagho segun Eddy. Dos luna despues di e atentado riba de Vries na yüli 2021, premier Rutte a haña èkstra vigilansia debí na menasa. Den sèptember 2022 a bolbe duna Rutte mas vigilansia. No ta konosí si e deklarashonnan di Eddy a hunga un ròl den esaki.