DEN HAAG—Gran mayoria den Tweede Kamer ta sostene e diskulpanan ku gabinete a ekspresá luna pasá pa pasado sklabitut.

Tweede Kamer a debatí ayera henter dia riba e tema. Den e debate parlamentarionan a hasi hopi pregunta riba e fondo di konsientisashon ku gabinete kier reserva 200 mion euro. Premier Rutte a ofrese diskulpa pa pasado sklabitut dia 19 desèmber último. Shete otro miembro di gabinete tabata na Surnam i Karibe hulandes pa papia riba e tema. Promé ku e diskurso di Rutte tabatin hopi intrankilidat i diskushon despues ku informashon a lèk. Hopi hende a puntra dikon tin tantu pura i dikon gabinete no a deliberá riba esaki adelantá. Riba 1 yüli 2023 ta kumpli 160 aña di abolishon di sklabitut pa gobièrnu hulandes i 150 aña ku e último katibunan a keda liberá. Esaki lo tabata un mihó fecha segun kritikonan.

Rutte a bisa durante su diskurso ku pa un siglo hendenan a keda konvertí den merkansia di e manera mas horibel na nomber di estado hulandes. Den debate mayoria parlamentario a ekspresa apresio pa e paso di gabinete. Hopi a papia di un momentu historiko. Tambe nan a elogia e ròl di Rutte. Inisialmente Rutte tabata duda si ta pidi diskulpa, pero el a kambia di idea. Van Strien (VVD) ku tambe tabata duda a bisa ku e por haña su mes den e diskulpa. El a reklama e proseso brua pa yega na e diskulpa i tabatin preguntanan riba e fondo di konsientisashon. No ta bon kla unda e plaka ta bai. Mesun preguntanan otro parlamentarionan tabatin. Parlamentarionan Ceder (ChristenUnie) i Simons (Bij1) a papia den debate tokante nan envolvimentu personal den e tema. Simons a elogia Rutte pa su palabranan koutelosamente skohi.

Partidonan PVV, Forum Democratie, JA21 i Groep Haga no ta mira nada den e diskulpanan. Bosma a puntra su mes si nos ta tende progresivonan papia di nan sosten na e sklabitut mas grandi den siglo 20, komunismo na Rusia. Segun Forum Democratie ta duna e hulandes blanku inhustamente un sentimentu di kulpa pa su prohimo pretu.