Durante e kaso den korte,  CMC kontra gobièrnu, gerensha di CMC a splika kuantu un spesialista médiko ta gana.

Nieuwe Haven,– Gerensha di CMC a indiká na hues ku spesialistanan médiko ta ganando entre 300 mil pa 600 mil florin.

Durante un wisio sumario kaminda CMC ke ekskluí spesialistanan médiko for di e plafòn salarial, hues a puntra abogadonan i gerensha di CMC kuantu un spesialista ta ganando aktualmente den e hòspital. Komo kontesta, gerensha di CMC a indiká ku un spesialista ta ganando entre 300 mil pa 600 mil florin. Tambe miembronan di gerensha a indiká ku spesialistanan pafó di CMC ta ganando kasi 3 biaha mas tantu ku spesialistanan kontraktá pa CMC. Segun informashon spesialistanan ku ta traha pa nan propio klínika médiko ta fakturá CMC entre 600 mil florin pa 1.8 mion florin tur aña.

Mas aleu e gerensha di CMC a splika ku mas o ménos 75% di spesialistanan ta traha den servisio pa CMC i 25% di e otro spesialistanan ta traha pa nan propio klínika i ta fakturá CMC tur luna.

E wisio sumario a ser entemá dor di CMC kontra di gobièrnu di Kòrsou. Segun CMC, e plafòn salarial lo sòru ku Kòrsou lo bai pèrdè demasiado spesialista kual lo hinka e sektor médiko den peliger.