WILLEMSTAD: Resientemente Banco di Caribe a selebrá un momento históriko, ora ku Sra. Chanel Juliana a bishitá ofisina prinsipal di banko komo promé shofùr femenino ku a firma kontrato ku gerensia di banko pa kore e bùs BdC Express III.

Esaki a tuma lugá hustamente den e aña ku e banko ta selebrando su 50 aniversario. Sra. Juliana tin 36 aña di eksperensia komo shofùr di bùs i ta sumamente kontentu di por djòin BdC su servisio di bùs. Direktor di BdC, Sr. Eduardo A. de Kort a duna Sra. Juliana un kaluroso bonbiní na e tim di BdC. “Nos tin pleno konfiansa ku Sra. Juliana lo usa su añanan di eksperensia komo shofùr di bùs pa mantené e kalidat di servisio ku BdC Express III ta ofresé. Nos ta sigur ku e lo ta un bon representante di banko durante e rekoridonan ku lo ser realisá na diferente parti di Kòrsou. Nos ta deseá  Sra. Juliana hopi éksito ku su reto nobo”.     

Tokante BdC Expres III

Pa mas ku 30 aña, Banco di Caribe ta ofresé diferente organisashon sosial, grupo di grandinan i skol e oportunidat pa usa e bùs gratuitamente pa nan rekorido i paseonan. Esaki ta un di e maneranan ku Banco di Caribe ta duna su aporte na diferente grupo den nos komunidat.