WILLEMSTAD, — Presidente di fundashon LIKE a indiká anteriormente ku hopi muchu no ta risibí e mesun formashon na kas pero ku si enseñansa por aportá na e mucha su formashon na manera ku e por profilá den su edukashon.

Na aña 2011 OWCS a traha konhunto ku Hulanda den kual a formulá desaroyo di un método di lès den hulandes komo un idioma stranhero, envolví mas e maestro den e proseso i ampliá e desaroyo di eksperensia den enseñansa na Papiamentu. Fundashon LIKE a indiká anteriormente ku e sistema aki no ta promové inklusividat den enseñansa ya komo hopi mucha ta pegá despues ku e idiomanan grandi manera Hulandes. Na 2015, 193 miembro di Nasionnan Uni a establesé un agènda di desaroyo pa 2015-2030 ku tin dieshete meta di desaroyo sostenibel.

E metanan aki mester pone fin na pobresa i desigualdat entre otro, i hopi biaha nan tin konekshon direkto òf indirekto ku enseñansa. Gobièrnu di Kòrsou a traha un agènda di desaroyo nashonal pa Kòrsou en kolaborashon ku Nashonnan Uni. E vishon di e agènda di desaroyo nashonal ta pa hasi enseñansa na Kòrsou algu na alkanse pa tur hende i pa stimulá aprendisahe durante henter e persona su bida. Fundashon Lenga i Konosementu den Enseñansa (LIKE) ta indiká ku desigualdat ta presente den sosiedat pero ku mester krea oportunidat igual pa tur mucha.

Ku esaki Fundashon LIKE a duna di konosé ku apertura di e instituto nobo riba 1 di desèmber yamá Instituto Nashonal di Idioma Curaçao, ta mustra ku tin interes pa desaroyá i protehé idioma Papiamentu kual ta parti di nos identidat i tambe ta mustra interes pa hisa nivel di otro idiomanan no na skolnan so pero tambe bou profeshonalnan di pais kompletu. Fundashon LIKE ke pa rekordá ku no ta tur mucha ta wòrdu lanta i formá den e mesun sirkunstansia. Ku esaki fundashon LIKE a kompartí ku enseñansa no por nesesariamente evitá sirkunstansha ku muchanan ta lanta aden pero si enseñansa por aportá na un chèns pa tur mucha por siña bon i asina desaroyá nan mes bon.

Fundashon LIKE ta opiná ku mester tin lenguahe den enseñansa for di edatnan yòn, ku ta yudá  e mucha gana mas konosementu i desaroyá su mes profeshonalmente den bida despues. Robbin Martina, presidente di fundashon LIKE a kompartí anteriormente ku na mayoria skol básiko hopi skol ta duna lès na Papiamentu i despues muchanan ta keda transmití pa un skol ku ta kontinuá na Hulandes I esaki ta trese barera pa e hóben ku tin ku siña na Hulandes. Presidente di fundashon LIKE ta splika, ku e sistema di enseñansa na Kòrsou ta pone ku hopi mucha ta kai atras i esaki ta sigui stroba nan henter nan bida.

Robbin Martina, presidente di fundashon LIKE a kompartí ku mayoria informashon no ta na Papiamentu, ni skibi ni online. Pues fundashon LIKE ke pa promové un enseñansa ku ta duna tur mucha e mesun base pa nan desaroyá tur loke nan tin aden. Esaki ta enserá un enseñansa riku na idioma, ku un variedat grandi di buki di lesa ku ta pika e mucha su fantasia i esaki ta inkluí bukinan i lès di material na Papiamentu tambe.