WILLEMSTAD—Por òf no por ? Te un kuart’i ora promé ku salida, e organisashon di Surf for the Roses djadumingu ei tabata na duda. E pronóstiko di bientu tabata parse poko pa un travesia bon for di Klein Curaçao pa Mambo Beach. Sinembargo, nan a bai. Pasobra, mas ku tur kos, e meta tabata pa hala atenshon i donashon pa Fondo Prinses Wilhelmina. I e mishon aki no a kaba na Mambo; nan ta sigui lucha pa esaki ketu bai.

Aña pasá Surf for the Roses a hasi su debut komo parti di Ride, Swim i Walk for the Roses, ku Orco Bank komo patrosinadó prinsipal. Na e momentu ei, tabata tin hopi bientu i ola grandi. Awor tabata nèt kontrali. Na e lugá di salida serka Irie Tours, e inisiadó Kim Matroos (doño di Awa Salu Kiteboarding) i e organisadó Laura Goense a deliberá promé ku representantenan di windsurf, wingfoil, windfoil i kitesurf. Tur hende tabata sa ku no ta bai ta un dia di sùrf fásil, pero for di tur e disiplinanan a bini un ‘GO’.

“Nan tur ta ‘deporte ekstremo’ i esaki ta bai kompañá ku bientu fuerte. Normalmente sùrfista no ta lanta for di kama ku un pronóstiko asina”, Kim Matroos a bisa, mirando atras. Awor tur hende tabata kla. No solamente e sùrfistanan, pero tambe un ekipo grandi di voluntario ku boto di reskate, personal médiko, fotografnan, piloto di drone, jetski, Citro, helikópter di Warda Kosta i hopi mas. Matroos: “Mi ta hopi kontentu i orguyoso ku e sùrfistanan tabata dispuesto pa bai apesar di e bientu moderá”.

Unabes ku nan a yega Klein Curaçao, nan a ripití e instrukshonnan di sùrf. Despues nan a subi laman, meimei entre e turistanan ku tabata landa. Hustamente e momentu ei, bientu a baha ainda mas. Esaki si tabata un problema, spesialmente pa e wind-sùrfista i wingfoiler-nan. Nan esfuersonan pa keda na sierto velosidat no a yuda, resultando den hopi ku mester a laga nan intento.

Stéphane Vignet tabata finalmente e úniko wingfoiler ku a logra yega Mambo. Aña pasá el a partisipá, pero no a logra. Meskos ta konta pa kite-sùrfista Tessa Wevers, kende a bai for di e promé edishon, pero no a yega final. “Mi a praktiká hopi e último aña aki. Awor mi ke i mester logra esaki di bèrdat”, el a bisa for di promé. Despues di 2.5 ora di lucha riba laman, el a dirigí su fli briando te na e meta final.

Pa motibu di leshonnan i malesa, algun sùrfista a hala bèk hasta promé ku nan a kuminsá, i di e 33-nan ku a sali, finalmente 16 a yega na Mambo Beach. Matroos: “Otro aña nos ke buska partisipante tambe for di Boneiru, Aruba i Hulanda, pasobra e kantidat di sùrfista avansá na Kòrsou ta limitá. Pero míles di partisipante, manera na Ride, Swim i Walk – tambe en bista di seguridat riba awa -, no ta alkansabel pa Surf for the Roses. P’esei riba tera nos ta konsentrá riba PWF.”

E sùrfistanan a aseptá sekshon di Kind & Kanker di PWF. E sekshon aki ta organisá aktividatnan i duna sosten sikológiko na muchanan ku kanser i na muchanan ku tin ser kerí ku kanser. “Nos trahadónan sosial ta mira den práktika ku hende tin difikultat pa papia ku mucha tokante kanser, emoshon i luto. Miéntras esaki ta hopi importante pa mucha i meskos ku pa adulto. Di moda ku muchanan ta siña di karga ku esaki sin keda ku problema despues”, Ageeth Termars, presidente di PWF, a bisa.

“E sùrfistanan ta yuda nos tambe pa kibra e tabú aki.” Asina nan a distribuí poster i flyer digital ku e lema “Sobre, si, tin mag di papia di kanser!” I ku tur e foto i vidionan impaktante di Sùrf 2024, nan tin un arma fuerte den nan man. Através di (sosial) medionan, nan ta spera di alkansá ainda mas hende i asina logra mas donashon den e simannan binidero. Matroos: “Pasobra donashon por hasi ainda riba prinseswilhelminafonds.cw, referiendo na ‘Sùrf’, pa e entrada ta bai pa Kind & Kanker”.

Surf for the Roses a bira posibel danki na sosten di Orco Bank, AFAS, Irie Tours, Awa Salu Kiteboarding, Powerboat Caribbean, Blend Curaçao, Pepsi, Mermaid, Mammoet, Bluefinn, Tiki Boat Rentals, Miss Ann, Citro, Kustwacht Caribisch Gebied, MedPoint, Emergency Medical Team i BoVaarbewijs.

Konhuntamente por mira partisipantenan i tambe durante e evento.