PUNDA — ayera durante e Konferensia di Prensa sra. Zita Leito Minister di Salubridat a splika ku entrante awe personanan den funshon vital por registrá pa risibí bakuna.

Na momentu ku personanan a kuminsá subi riba e wèpsait bakuna.cw pa registrá mesora a tuma nota ku e wèpsait ainda no ta brinda e posibilidat pa registrá pa bakuna bou di un funshon vital. Vigilante a hiba kombersashon ku dos dosente ku awe den oranan di mainta tambe a topa ku e mesun sorpresa na momentu ku nan a subi pa registrá.

Screenshot ku e dosentenan a manda pa Vigilante ta mustra ku ámbos a trata na drenta den kontakto ku 9345 sin e resultado deseá. Un di nan a bèl mas ku 137 bes i e otro mas ku 58 biaha. Mas aleu un di e dosentenan a splika vigilante ku e proseso aki ta unu sumamente frustrante. “Ta yama por lo menos 50 bia promé ku haña konekshon ku e kontestadó outomátiko di bakuna. Despues di esaki ainda no ta sigur ku bo ta keda konekta ku un operadó, e liña a kai afó varios bia promé ku por a keda kontektá pa traha un sita.”