Heridanan ku Duwayne Douglas a sostené despues di a risibí bala di arma di kandela di Dishane Nelson.
Willemstad,– Siman pasá korte a dikta ku e hóben Dishane Nelson (2000) mester sinta un kastigu 10 aña despues di a tira pareha di su mama tres biaha resultando fatal pa e pareha.
Segun investigashon forensiko pareha di mama di Dishane Nelson a risibí 3 perforashon di bala riba 8 di mei 2021 despues di un maltrato violento. Riba 8 di mei 2022 defuntu Duwayne O Douglas a maltrata mama di e akusado riba un forma severo. Via whatsapp e mama tabata splika su yu, Nelson, ku pareha Douglas a laga su kara riba un forma desformal. E mama a keda ku wowo tur blousá riba 8 di mei 2022.
Despues di a risibí e notisia, Dishane Nelson a sali su trabou na WTC pa buska drechi di su mama. Unabes Nelson a drenta kurá di e kas di e pareha, Nelson a i 6 tiru for di un arma di kandela kaminda 3 bala a perforá pareha violente Duwayne Douglas.
Raport forensiko a konkluí ku bala a perforá Douglas na altura di su pulmon, na altura di su apdómen i e último bala a perforá Douglas na banda rèks lateral di su apdómen. Tur 3 bala a sali for di e kurpa di e defuntu, pero den nan trayekto a kousa basta daño den kurpa di Douglas. E rapòrt forensiko a indiká tambe ku e bala ku a drenta apdómen di Douglas tabata e bala fatal. Segun e rapòrt, e bala ku a perforá frontal lenks ariba di e apdómen a kousa perforashon di e higra, perforashon di e diafragma i kòrta un pari di e pulmon rèks. Tambe e bala aki kibra e di 5 reps saliendo for di e skuder rèks. E rapòrt ta sigui splika ku e bala aki a kousa e morto.
Mas aleu e rapòrt ta splika ku e trayekto i perforashon di e balanan skèrpi por insinuá un evento kaminda tabata tin bringamentu, hopi moveshon, skondementu i asta korementu dor di e víktima. Por último e rapòrt ta finalisá splikando ku Douglas a fayesé debí na heridanan sostené durante e tiroteo.
E veredikto di korte a dikta ku e hóben akusado, yu di e mama maltratá, Dishane Nelson lo mester sinta un kastigu di 10 aña. Tambe Dishane Nelson mester paga 19 mil florin na famia di Douglas pa daño perwisio.