WILLEMSTAD – Ministerio di Enseñansa, Siensia, Kultura i Deporte (ESKD) den kooperashon ku Instituto Nashonal di Idioma Curaçao, i AMAK, a organisá un tayer, ku ta trata e arte di komponé den idioma papiamentu. 

 E promé seshon a tuma lugá djaluna dia 19 di febrüari, kaminda tabatei presente Minister di ESKD, sr. Sithree van Heydoorn, kende a hasi e apertura, i tambe sr. Manfred (Feco) Gomez, kende a hiba palabra na nòmber di AMAK. E trayekto ak tambe ta forma parti di e proyektonan ku ta pone enfoke i atenshon na nos idioma papiamentu.  

E anochi tabata guiá pa moderadó sr. E. Maduro, i oradónan di órden tabata sra. Elvira Bonafacio i sr. Farley Lourens. Por mira bèk riba un aktividat eksitoso komo ku a risibí mas ku 120 inskripshon. públiko presente tabatin hopi interes pa partisipá na e trayekto akí, kaminda nos lo sigui engrandesé i kaminda nos ta sigui engrandesé nos idioma papiamentu den harmonia ku nos kultura musikal. 

Minister van Heydoorn ta sumamente kontentu ku e trayekto aki i tin sigur ku aki 6 luna Kòrsou ta bai tin mas kompositor pa komponé riba nivel profeshonal den nos idioma papiamentu.