Willemstad—–Djarason 29 di sèptèmber 2023, ORV den estrecho koperashon ku ‘Inspectie SOAW’ e servisio di kontròl di Ministerio di Sociale Ontwikkeling, Arbeid & Welzijn (SOAW) a organisá un tayer di Trafikashon di Hende i Kontrabanda.

Miembronan di KPC i ORV a partisipá na e tayer. Den e tayer (Menshandel Mensensmokkel II) a pone énfasis riba e parti eksplotashon di hende pa loke ta trata e parti di trabou. Hefe di Initiële Opleidingen di ORV   a habri e tayer i funshonarionan di ‘Inspectie SOAW’ a duna e presentashon. Kasi 30 kolaboradó di ORV i KPC tabata presente. Funshonarionan di ‘Inspectie SOAW’ Shadée Strickx, Dámaris Sprockel i Norman Mattheeuw a duna un presentashon amplio riba e eksplotashon soshal di e hende muhé, tambe riba e parti di labor.

Sr. Norman Marchena, di Ministerio di Hustisia, kordinadó di e proyekto Trafikashon i Kontrabanda di Hende a sostené e presentadónan di ‘Inspectie SOAW’ pa loke ta e parti di rekonosé señalnan di Trafikshon i Kontrabanda di Hende i di eksplotashon kriminal.

A trata un otro forma di tráfiko di hende den e kaso aki eksplotashon laboral. Ora ta trata di eksplotashon laboral ta un kombinashon di situashonnan serio, inhumano na trabou. Señalnan di esaki por ta: No ta paga e trahadó òf ta risibí un pago demasiado abou. Mester warda hopi tempu pa risibí e sèn pa e trabou hasí. E trahadó no por disponé di nan propio pasaporte. A trese e trahadó Kòrsou ku promesanan falsu. Ta maltratá, chantagiá i menasá trahadó. Ta obligá trahadónan pa hasi otro tipo di trabou ku a palabra.

Meta di e tayer aki ta pa e polis of funshonario ku a presensia e tayer, por rekonosé delito òf krimennan manera ariba menshoná, tantu pa loke ta Trafikashon i Kontrabanda di hende i eksplotashon di trahado. Tambe pa pone ‘Inspectie SOAW ‘ na altura pa nan por hasi investigashon riba e parti laboral.

KONTENIDO

Den e tayer aki ta spliká algun tópiko relashoná ku tráfiko di hende i eksplotashon laboral, tarea i autoridat di Inspekshon di Labor. E parti di lei pa loke ta

‘Landsverordening arbeid vreemdelingen’ i ‘Landsverordening Toelating en Uitzetting.

Otro legislashon i reglanan relevante pa Inspekshon di Labor. Kaso práktiko, trafiko di hende i kooperashon ku partisipante(nan).

Tabata un mainta hopi interaktivo ku presentashon oudio visual i ku hopi pregunta i interakshon entre e presentadónan i e kolaboradó di e kuerponan presente.