E temblor tabata esun mas duru sintí den e aña 2023 na Repúblika Dominikana.

SANTO DOMINGO – Un fuerte temblor ku episentro na ost di Montecristi, a keda sintí den ora nan di ayera na Repúblika Dominikana.

Segun e geólogo Osiris Leon, e fuerte temblor di tera di magnitut preliminar 5.3, ku episentro na nort di Villa Vazquez i na ost di Montecristi, i ku a sakudí henter e liña Nortost i henter Cibao, inkluyendo Santo Domingo i e partí sùitost di Repúblika Dominikana. Esaki a keda indiká di ta e temblor mas fuerte sintí den e aña 2023 aki.

Ademas, outoridat nan di Moca, Dajabon, Montecristi i otro provinsia nan, a manifestá ku a sinti e temblor fuertemente den diferente komunidat.

Mas aleu no a duna informashon di persona nan ku por a resultá heridá ni tampoko daño nan material ku por a keda registrá di gran nifikashon debí na e temblor.