E temblor a sakudí edifisio nan pero no a laga daño nan material ni personal atras.

BOGOTA – Un temblor di magnitut 5.2 riba skala di richter, ta loke a sakudí Colombia den ora nan di djaweps anochi. Esaki na e parti sentral di e pais, lagando Bogotá sakudí, segun a keda indiká pa e Servisio Geológiko Kolombiano.

E temblor a tuma lugá na 20.52 di anochi i e episentro a keda sentrá na e munisipio di San Juan de Arama, na e departamento di Meta.

E profundidat di e temblor tabata superfisial, ménos di 30 kilometer pero su efekto nan a keda notá na vários zona di e sentro di e pais, inkluyendo Bogotá, unda el a tembla edifisio nan pero no a reportá daño nan serio ni tampoko víktima nan.

E kapital kolombiano tin algun luna ta sinti temblor nan di magnitut paresido. Na final di luna di mei, a registrá un temblor di 5.7 i dia 10 di mart, ora tabatin un temblor di 5.9 grado, ku a keda registrá na 4.18 i na un profundidat di 151 kilometer. Esaki tabatin episentro den e region di Los Santos.

Tambe den e mesun luna di mei, Colombia a biba un temblor di 6.6 riba skala di richter, den e region na frontera ku Panamá. Esaki tabatin episentro den awa di Karibe, na 41 kilometer di e munisipio di Acandí, na e departamento di Antioquia, na norost di e pais.