Willemstad  –  Ofisina Sentral di Statistik (CBS) ta informá ku lo ekstendé e temporada di senso te ku 27 di novèmber próksimo. Durante di e periodo aki no solamente nos ta sigui ku e konteo normal na e kas di famia pero nos ta kuminsá tambe ku e asina yama konteo sekundario (natelling).

E periodo sekundario (natelling) tabata planeá kaba pa sosodé durante di luna di novèmber. Durante di e periodo di konteo sekundario (natelling) ta bishita kasnan ku pa un of otro motibu no a wòrdu konta ainda.  Motibu di e prolongashon aki ta dor ku tin enkuestadónan ku a kai afó durante di e periodo pues tin ménos hende den ‘field’ pa pasa na e kasnan. Tambe e kalor ekstensivo ku tin awor aki ta pone ku e produkshon di e enkuestadónan a baha. Pa e motibu aki nos ta bai introdusi  otro alternativanan pa halsa e produktividat.

CBS  a kambia tambe e método di repartishon di e adrèsnan pa kada enkuestadó.  E manera nobo ta duna kada enkuestadó e posibilidat pa haña un kaya kompleto ku e tin ku bishitá.

Ta kuminsá, e wikènt di 20/21 òktober, drenta bario ku un grupo di enkuestadó i ta bishitá e wikènt tur kas ku ainda no a risibí un bishita di Senso ainda. Nos ta kuminsá e wikènt aki ku e bario di Souax/Ser’i Kandela. Asina nos ta keda kontinuá hasi tur e siguiente wikentnan. Lo informá e bario konserní ki dia nos lo drenta den nan bario.

Progreso di Senso23

Di e totalidat di +/-80.000 adrèsnan ku lo mester wòrdu bishitá Senso a bishitá te ku e fecha aktual 49% di esaki.

CBS ta pidi tur persona ku ainda Senso no a pasa na nan kas pa keda pendiente pa un bishitá durante di e simannan ku ta bini aki.