Asombrá: Curiel i su abogado Achim Henriquez a keda asombrá despues di a skucha e kostonan menshoná pa e testigu.

Nieuwe Haven—Siman pasá un testigu kier a kobra kasi 3500 dòler estado unidense pa deklará algu mas ku 30 minüt den korte. Esaki a sosodé durante e enkuesta sivil den kaso di Reinard Curiel kontra di Ennia.

Ta trata di un eksperto lokal den asuntunan fiskal, kende mester a presentá su kostonan pa yega korte i deklará siman pasa djaweps den e kaso. Hues mr. Maite de Haseth, a puntra e testigu pa duna su kostonan, kual el a apuntá na 750 dòler pa ora, pero no ta esei so tabata su kostonan. E konsehero fiskal, kende ta duna servisio na Ennia Caribe Holding, a splika ku e la traha kasi 10 ora pa e por a bin duna su kontestanan den korte i alabes tin kosto di su sekretaria. E hues a apunta ku ta trata di e kostonan kual e tabatin yega korte i deklará durante su interogashon bou di huramentashon, unda e la kontesta di por duna un deskuento na 350 dòler na 10 ora pa totalisá 3500 dòler estado unidense.

E suma menshoná a kue tantu hues komo abogadonan presente for di base, debí ku no ta usual pa un testigu kobra asina tantu sèn.