WILLEMSTAD – Amerigo Thodé ku ta presidente dje Komishon Asuntunan di Reino, Relashonnan Interparlamentario i Asuntunan Eksterior a tuma nota dje intenshon di Tweede Kamer di Hulanda, pa trata e proposishon pa un Lei di Reino, relashoná ku e Tratado ku ta regla evitamentu di kobransa di impuesto dòbel. I e ke pa Parlamento di Kòrsou debatí tokante esaki.

Ta trata di e Tratado di Reino Hulandes pa loke ta trata Kòrsou i Repúblika di Malta, pa evitá impuesto dòbel i prevenshon di evashon fiskal pa loke ta trata impuestonan riba entrada. E fecha di entrega dje relato ta stipulá pa 24 di mei pa 2’or di atardi. Segun Thodé, mirando e importansia di e proposishon di Lei di Reino akí pa Kòrsou, su komishon ta konsiderá nesesario pa Komishon Sentral di Parlamento trata e proposishon di lei akí i emití un informe tokante di esaki, konforme e artíkulo 16 di Statüt. Lo entregá e informe akí di Komishon Sentral na Tweede Kamer pa un reakshon. Presidente Thodé a porlotantu a proponé pa Komishon Sentral trata e proyekto di lei mas pronto posibel i saka un rapòrt.