Boka Simon—Outoridat kompetente ayera a deskubrí un “duikschool” klandestino na Boka Simon. E Tim Multi Disiplinario konsistiendo di funshonarionan di Aqualectra, BAB, ROP i Inspekshon Ekonómiko di MEO a bishita e “duikschool” ubika na playa di Boka Simon.

A bin konstatá ku e skol di sambuya tabata ópera sin ningun klase di pèrmit ópera pa un penshonado ulandes oropeo, kende pa kolmo no tabata paga koriente. Téknikonan di Aqualectra na e sitio a determiná ku e propietario klandestino tabata  hòrta koriente, suministrá su kas ku koriente pa despues pasa e koriente ilegal pa e skol di sambuya.  Aqualectra a keda atendé esei ku e propietario.

Tambe a konstatá algun “tapa solo” konstruí sin pèrmit”, ROP mesora a tuma na nan enkargo pa atendé ku esei miéntras. Aparte di tur e ilegalidat na e sitio, funshonarionan di BAB tambe a konstatá ku e kompania no ta paga ningun klase di impuesto miéntras e tabata kobrando pa sambuya. BAB tambe a keda enkargá ku mas investigashon.

Aparte di tur e ilegalidatnan konstatá, a rùim por algun vehíkulo stashoná riba tereno di gobièrnu. E gastunan ta bin riba nòmber di e doñonan di e vehíkulonan  ku ta wòrdu deshasí. Ku e operashon aki e Tim Multi Disiplinario  a manda un mensahe ku no por hasi i deshasí riba tereno di gobièrnu i mester atendé tur kos na un manera legítimo.