WILLEMSTAD – Minister Presidente Gilmar Pisas a presentá ayera den sala di Parlamento relashoná ku e asina yamá “ora di pregunta” (“vragenuur”), pa kumpli ku petishon di miembro independiente di Parlamento Zita Jesus-Leito. Pisas a kontestá preguntanan relashoná ku “Desaroyo rondó di benta di Campo Alegre” dje Parlamentario. Na total el a manda 20 pregunta den su petishon skirbí p’e reunion. E kontesta ku tur hende ke prinsipalmente ta riba e pregunta “Kiko ta e destinashon real ku gobièrnu tin den mente pa e kompleho akí”. Segun Pisas tin 3 opshon. Kombertí e edifisio den un sentro di kuido, un hub digital òf mantené komo un sentro di prostitushon.

Despues di e kontestanan, diferente miembro di Parlamento a hasi uso dje oportunidat pa hasi un pregunta adishonal, ku seguidamente Pisas a kontestá promé ku Presidente di Parlamento Charetti America-Francisca a sera e reunion, ya ku esun ora stipulá pa e “ora di pregunta” a terminá. Di tur manera pa por mantené Campo Alegre komo un sentro di prostitushon, lo mester bini ku un maneho pa esaki. Tur e añanan ku e tabata habrí komo sentro di prostitushon, Campo Alegre tabata operá basá riba un maneho di toleransia (“gedoogbeleid”), ya ku prostitushon ta kontra di lei.

Segun Pisas ta e fundashon Stichting Overheids Accountantsbureau (SOAB) ta hasiendo e estudionan pa sa kiko ta e mihó for di e 3 opshonnan. Pero di tur manera tur kos ta mustra ku lo skohe pa e di tres opshon, esta mantené e kompleho di Campo Alegre ta konta ku un superfisie di 72 mil meter kuadrá, komo un sentro di prostitushon ‘legal’, ya ku e nesesidat ta grandi. Segun e Promé Minister, ta hopi hende a aserk’é ku e pregunta ki dia ta habri Campo bèk. Hopi siudadano ta hasi e mesun pregunta den medionan sosial tambe. E kontesta di Pisas ta kontradesí basta rumor tambe tokante plannan di futuro dje sentro.

Di tur manera Jesus-Leito ta haña ku mester a laga hasi estudio promé ku kumpra Campo Alegre na findishi riba djamars 26 di sèptèmber 2023. Manera tur hende por kòrda Pisas a bai personalmente na e findishi. Despues el a deklará ku gobièrnu a kumpra e edifisio di Campo Alegre pa 8 mion florin. Segun Pisas, mester regulá prostitushon na Kòrsou i ta diferente eksperto ta embolbí den e proseso. Por pensa riba ministerio di Salubridat, Inspekshon di salú, ministerio di Desaroyo Ekonómiko i tambe di Hustisia, i tambe profeshonalnan médiko.

Pisas a ripití ku e echo ku gobièrnu a kumpra e tereno tin hopi benefisio pa kaha di pueblo, ya ku e plaka a bai pa e Fondo di Kriminalidat, ku ta disponibel pa finansiá proyektonan pa kombatí kriminalidat. Mester kòrda tambe ku ainda mester kobra plaka di debe na impuesto di propiedat inmóbil (“Onroerende Zaak Belasting”, OZB). Ademas ta spar plaka di paga seguridat pa kuida e edifisio kontra krímen.

Echo ta ku for di novèmber 2021 Konseho di Ministernan a disidí ku mester bin un investigashon riba futuro di Campo Alegre, kaminda gobièrnu for di añanan 50 ta tolerá pa praktiká prostitushon legal. Manera Vigilante a informá na mart 2022, Minister di Finansa Javier Silvania ta(bata) na kabes di un grupo di trabou ku lo mester konsehá Minister di Hustisia riba posibel kontribushon di gobièrnu na reapertura di Campo. Pero manera menshoná, reapertura no ta bai sin mas, pasó e motibu pa kua a pèrmití Campo kuminsá drai den añanan 50, tabata pa evitá krímen di prostitushon riba kaya. E proseso di ‘prostitushon legal’ ta inkluí kòntròlnan médiko regular, loke ta evitá plamamentu di malesanan venériko.

Sinembargo segun minister Silvania e tempu ei, a resultá ku e asina yamá ‘gedoogbeleid’ (maneho di toleransia) pa prostitushon den Campo so no ta sufisiente pa evitá sierto aktividat kriminal òf pa mantené sufisiente órden. Pesei dia 24 di novèmber 2021, Konseho di Ministernan a disidí di instalá un grupo di servisio, enkabesá pa Silvania mes, pa konsehá minister di Hustisia Gilmar Pisas. Na yüni 2020 gabinete Rhugenaath ya a laga hasi un investigashon general. Lo mester a investigá tambe si hende muhé lokal lo ta pèrmití pa traha den Campo. Pasó den añanan 50 a prohibí esei, pasó e no tabata korekto.

Minister Silvania a keda di duna resultado dje investigashon dje grupo di trabou ku e ta(bata) enkabesá for di fin di mart 2022. Resultado dje investigashon ei no ta konosí te ainda. Di otro banda, ministerio di Hustisia ta enkargá solamente ku dunamentu di pèrmit na muhénan strañero, pa bin traha den Campo komo prostituta. Pero e eksistensia di Campo ta toka tur ministerio, p’esei kada bes Konseho di Ministernan ta(bata) papia huntu tokante e kuestion akí. Diskushonnan sí mester sigui tolerá prostitushon den Campo ta kanando for di tempu di minister di Hustisia Nelson Navarro.

Algun aña pasá Minister Silvania, kontestando preguntanan di parlamentario Gilbert ‘Gibi’ Doran di MFK tokante futuro di Campo, a ripití e realidat ku Vigilante semper a informá di dje, esta ku Campo ta un propiedat ekspropiá pa Ministerio Públiko. Campo tabata pues un propiedat di gobièrnu, for di promé ku a kumpr’é na findishi. Ministerio Públiko tabatin e derecho di bende Campo riba findishi i tabata semper e intenshon pa stòrt e plaka ei den e Fondo di Kriminalidat. Campo tin 150 kamber. E último persona ku tabata operá e bordel ta Rectour Corporation nv. Medio 2020 hues a deklará e kompania aki bankarota.