PUNDA,– Situashon ku a sali kompletamente for di man e minister di asuntunan sosial a bisa parlamento djaweps den oranan di mèdia. Ruthmilda Larmonie-Cecilia a splika su maneho riba djaweps durante un reunion públiko ku parlamento.

Tantu minister di SOAW, Ruthmilda Larmonie-Ceclia komo minsiter di desaroyo ekonómiko, Ruisandro Cijntje, tabata presente den sala di parlamento. E tópiko di debate tabata e maneho aktual di gobièrnu enkuanto seramentu di awa na kasnan di ménos rekurso. Kaminda minister Cijntje a splika ku tin alrededor di 1000 kas ku no tin akseso na awa, e minister di asuntunan sosial a indiká ku debenan di e kasnan aki a sali kompletamente for di man.

Minister Larmonie-Cecilia a indiká ku tin kas ku debenan riba 20 mil florin. Tin kas ku debe di 20 mil florin, debe di 40 mil florin i asta tin kas ku tin debe di alrededor di 148 mil florin. E problema ta ku na momentu ku Aqualectra deskonektá e awa, e habitantenan ta rekonektá nan awa riba forma ilegal. I na momentu ku Aqualectra konstatá esaki, e kompania ta multa e kas ku un suma supstansial.

Fin di aña e kompania di utilidat a kuminsá ku un kampaña kaminda tur kliente ta risibí un temporada di grasia kaminda nan por dekontá uso di awa i koriente na momentu ku nan tabata hasi uso di esaki riba forma ilegal. Despues di un periodo di dispensashon di 2 luna, kual a finalisá riba 31 di òktober, e tim di kontròl a dal paso firme pa enfrentá iregularidat na e ret di distribushon di Aqualectra i tambe uso ilegal di awa i/òf koriente. Entre 1 di Novèmber 2023 te ku awor ya a kontrolá mas ku 308 negoshi, tienda i bibienda i for di esakinan 6 negoshi komersial i 54 residensia a haña but. E butnan den situashonnan kaminda konstatá iregularidat por yega te na 20.000 florin. E butnan mas haltu ku a kai e periodo aki tabata 15.000 florin na un negoshi na Rooseveltweg i 15.000 florin na un negoshi situá na Santa Rosaweg.   

Pa e parti di uso ilegal di awa i koriente e direktora finansiero di Aqualectra a splika ku nan ta pèrdiendo entre 15 mion pa 20 mion florin dor di uso ilegal. Sinembargo e direktora finansiero, Neysa Isenia, a indiká ku si baha e uso ilegal, henter pueblo di Kòrsou por benefisiá ku un tarifa mas barata di koriente i awa.