Tur aña aproksimadamente 70% di e gastunan di overtaim di KPC ta bini di APD (mas o ménos 40%) i BPD (mas o ménos 30%).

WILLEMSTAD – Kontraloria General (Algemene Rekenkamer Curaçao, ARC) a publiká un rapòrt hopi preokupante pa loke ta trata trahamentu di overtaim denter di Kuerpo Polisial Kòrsou. E kousanan prinsipal ta falta di personal na KPC i e echo ku ta aplikando tarifa mas haltu ku loke lei ta preskribí, kombiná ku un oumento den e kantidat di ora di overtaim debí na entre otro falta di personal. No tin garantia ku e oranan di overtaim deklará ta di akuerdo ku lei tampoko, ni ku realmente a traha e oranan akí.

KPC ta esun ku ta kousa 80% dje gastunan total ku gobièrnu di Kòrsou mester paga for di presupuesto di pais. E gastunan akí a subi di 2018 pa 2021 di 12,5 mion te na 19,4 mion florin. Asina Kontraloria General a konstatá i informá den su rapòrt “Overwerk Politie”. E departamentonan prinsipal di KPC segun su struktura orgániko, ta tim di maneho/staf i Bedrijfsvoering i Politiedienst, ku ta inkluí e divishonnan “Algemene Politie Dienst” (APD) i “Bijzondere Politie Dienst” (BPD), i “Recherche en Informatiedienst” bou di kual tin e divishonnan “Divisie Centrale Recherche” (DCR), “Divisie Informatie en Ondersteuning” (DIO), i “Divisie Georganiseerde Criminaliteit” (DGC) ta kai. E wijkbureaunan ta kai bou di APD. Kontraloria General: “Tur aña aproksimadamente 70% di e gastunan di overtaim di KPC ta bini di APD (mas o ménos 40%) i BPD (mas o ménos 30%).”

Vakatura

Na 2010, KPC a fiha e kantidat di fte (kantidat di miembro full-time) ku lo tin mester pa por kumpli ku e demanda di servisio polisial. Sinembargo, no a yena e kantidat di fte akí kompletamente i ya pa vários aña kaba tin un falta supstansial di personal. Pa ehèmpel, na 2018, 2019, 2020 i 2021 a keda sin yena respektivamente, 13%, 12%, 15% i 20% di e puestonan fiho di trabou. Lòs di esei, no por a usa tur trahadó disponibel, debí ku a usa personal pa tarea eksterno, tabatin fte no aktivo, i a usa sierto fte pa trabou ku no a kuadra ku nan tareanan original. Debí na esaki, na 2018, 2019, 2020 i 2021 respektivamente 9%, 12%, 11% i 9% di e personal no tabata disponibel. Ku otro palabra, e saldo nèto di personal disponibel den e añanan ei tabata respektivamente 78%, 77%, 76% i 71%.

Enfermedat

Den práktika, debí na e nivel relativamente haltu di ousensia pa motibu di enfermedat, e porsentahenan akí ta asta mas abou. Pa ehèmpel, den e añanan ei, e kantidat di ora di ousensia pa motibu di malesa pa persona pa aña tabata entre 45 i 331 ora. Ta bini aserka ku no por a programá e personal disponibel ku a sobra na un manera fleksibel den e roster di trabou. Esei ta entre otro debí na loke lei ta preskribí riba tereno di ora di trabou i di deskanso, i e echo ku no por usa personal ku ta disponibel di otro departamento pa solushoná falta temporal di personal. Na tur, e personal programá den e roster di trabou no ta sufisiente pa kumpli ku e nivel di personal mínimo preskribí pa e “wijkbureau”-nan i e oumento di demanda di servisio polisial, i esei ta generá e demanda di overtaim.

Tarifa mas haltu

Ta aplikando tarifa di overtaim ku ta mas haltu ku loke lei ta preskribí. No a formalisá e tarifanan akí ainda. Ademas no ta aplikando un sirkular publiká den 2012 korektamente. Komo resultado, e gastunan di overtaim ta mas haltu ku nan lo tabata si a apliká e tarifanan korektamente. Formalmente e gastunan adishonal akí di overtaim ta kontra lei. Mirando ku ta for di 2004 ta pagando overtaim basa riba tarifa mas haltu ku loke lei ta preskribí, esei no por ta e kousa di e oumento anual den gastu di overtaim. Sinembargo, e falta di personal ta pone e kantidat di (ora di) overtaim oumentá i e gastu total di overtaim ta oumentá mas ku lo tabata e kaso, sí e kantidat di ora a keda meskos.

Kontra lei i sin kòntròl

E gastunan di overtaim por ta debí parsialmente na ora di overtaim deklará i pagá indebidamente. Por bisa esaki ya ku no tin sufisiente garantia ku realmente a traha e oranan di overtaim deklará. No tin garantia tampoko ku e oranan trahá tabata inevitabel, esta ku e trabou no por a tuma lugá denter di e roster di trabou. No tin kòntròl interno pa verifiká esei i limitá e riesgo akí. Ta atvertí ku lo tuma medida disiplinario sí, pero sin menshoná ki medida eseinan lo ta.