WILLEMSTAD – Djaluna último tabata apertura di e training “Kerntaken Opsporing” (KTO) na skol di polis ORV.

E desaroyo akí ta resultado di un kolaborashon fruktífero entre dos akademia prominente, inisiá pa akuerdonan hasí ku e kolegio di hefenan di kuerpo polisial “College van Korpschefs”, Opleidingsinstituut Rechtshandhaving & Veiligheidszorg (ORV), i e akademia hulandes NPA.

E training, ku ta enfoká riba e abilidatnan esensial nesesario pa investigashon efektivo, ta spesial pa kursistanan di Korps Politie Karibish Nederland (KPCN), Korps Politie Aruba (KPA) i Korps Politie Curaçao (KPC). E kolaborashon akí ta subrayá e meta di e organisashonnan embolbí pa mehorá e kalidat di edukashon polisial den e region i segurá un nível haltu di profeshonalidat den trabounan di investigashon.

Den kuadro di e training aki a sali pa hermana isla Boneiru un dosente di ORV ku hopi eksperensia, señor Edmiro Jansen huntu ku ORV su sektor manager Post Initiële, señor Jowenny Troeman.

“Nan ekspertisio i dedikashon ta krusial pa e éksito di e inisiativa akí i ta ilustrá e kompromiso di tur parti embolbí pa elevá e seguridat i profeshonalidat den e region Karibense na un nivel mas haltu.”

E siguiente sekshon di e KTO ta planiá pa sèptèmber. E kursistanan lo tin sufisiente tempu pa prepará i saka e máksimo for di e eksperensia di e treinen úniko akí. “E inisiativa akí ta un prueba di e kolaborashon fuerte i vishon kompartí entre ORV i NPA, ku e meta pa fortifiká e kapasidatnan di investigashon den Reino. Nos ta ansioso pa mira e impakto positivo ku e treinen lo tin riba e desaroyo di nos miembronan ku ta laborá den e área investigativo. ORV ta deseá kursistanan hopi éksito pa ku e treinen akí. ORV tei pa eduká, elevá i segurá kada paso di studiante den sektor di seguridat.