WILLEMSTAD – E trayekto pa instalá panelnan solar riba dak di skolnan ta den fase 2. Ta e intenshon pa 4 skol mas haña instalashon pa kuminsamentu di 2024. Instalashon na 1 skol ya ta finalisá den e segundo fase akí. Asina Minister di Enseñansa, Siensia, Deporte i Kultura (ESKD) Sithree “Cey” van Heydoorn a splika Parlamento den un karta di kontesta riba preguntanan di Parlamentario Giselle Mc William na kuminsamentu dje luna akí.

Mc William a rekordá e Minister ku gobièrnunan di turno a inisiá e trayekto akí huntu ku Aqualectra i direktivanan di skolnan i ku ya a instalá na algun skol kaba. E meta tabata pa usa e daknan di skol instalá pa asina bende e koriente na Aqualectra, i pa hinka esaki bèk den Enseñansa. Segun e lider di MAN si ke instalá èrkonan na skolnan, mester bai revisá e modelo akí. E tabata ke un ‘update’ di Minister Van Heydoorn dje proyekto. Segun e Minister, e promé fase dje proyekto ta implementá i kompletá for di kuminsamentu di 2018. A instalá e panelnan solar riba dak di 5 skol: St. Paulus, St. Jozef, RK MTS, Amador Nita (SAAN) i Juan Pablo Duarte.

“For di e momentu ei Ministerio di ESKD a kuminsá produsí energia bèrdè i konforme e maneho stipulá ta entregá esaki na Aqualectra. Fase 2 dje trayekto a tarda pa motibu di e ‘lockdown’ di COVID-19, siendo tantu e material komo personal nesesario pa hasi e instalashonnan ya tabata na Kòrsou pa realisá esaki. Bon pa indiká ku instalashon panel solar ta impliká ku e kondishon di dak no solamente mester ta bon, pero ku e konstrukshon mester por karga e instalashon tambe. Den e proseso pa inisiá instalashon tabatin retonan grandi pa motibu dje kondishon i kapasidat dje daknan di skolnan.”

Segun e Minister, ministerio di ESKD a hasi loke ta nesesario ku koperashon di ministerio di Finansa pa drecha e daknan i ku e aña akí e proseso di instalashon por a kontinuá. E promé skol dje siguiente fase akí ya ta instalá i ta produsiendo i entregando, siendo konektá riba ‘grid’. “Na e momentunan akí mi ta den konsulta ku Aqualectra, despues di a risibí konseho di Asuntunan Hurídiko (WJZ), riba un proposishon ahustá den kua e skol por hasi uso direktamente dje produkshon, i suministrá e loke ku a produsí èkstra na Aqualectra. E plan akí lo benefisiá skolnan ku tin instalashon direktamente, ku ta un situashon deseá. Pronto lo sigui mas informashon dje plan pa e siguiente fase. Mientrastantu lo instalá e otro 4 skolnan di fase 2. Ta kalkulá ku lo ta kla ku e instalashonnan akí pa kuminsamentu di 2024.”

Parlamentario Mc William tabata ke sa Minister Van Heydoorn su opinion tambe riba plantamentu di palu pa yuda redusí temperatura na skol. E Minister ta kompartí e opinion ku palu ta redusí kalor. “Mas bèrdè den kurá di skol ta limitá rayo di solo direkto den lokalnan i riba alumnonan. Esaki ta yuda tene edifisio di skol mas fresku tambe. Ta bon pa indiká sí ku tin skol konstruí den área ku ta pèrmiti ménos bientu pasa. Esaki por kousa ku ni maske tin hopi bèrdè den skol, tòg por tin un heful sofokante. Pues den e plan stratégiko di alohamentu di skol, lo evaluá tur e aspektonan akí segun ta drecha i adaptá infrastruktura di e skolnan.”