Presis 14 bala a keda tirá, entre kua a alkansá tur e hòmbernan na altura di nan kabes.

LIMA – Tres venezolano a keda asesiná den un diskotèk klandestino na Perú. E loke ku a provoká e krímen, segun informashonnan suministrá pa outoridatnan peruano, ta un supuesto reglamentu di kuenta.

E víktimanan, identifiká komo José Brito Velasquez, Marcos Sanchez Astudillo i José Salazar Villarroel, a risibí tur herida di bala na altura di nan kabes.

E krímen aparentemente a keda kometé pa algun sikario di nashonalidat venezolano, ku a yega na e lokal konosí komo El Bosque, ubiká na Puerto Maldonado, na e region di Madre de Dios. E hòmbernan aki na nan yegada a lòs 14 diferente tiru.

Outoridatnan peruano a indiká tambe ku ámbos grupo tabatin un rivalidat na nan pais di orígen.

Aunke ku algun otro kompatriota na e sitio a intentá di yuda, esaki nan ya no tabata duna señal di bida. E tirunan tabata bon dirigí i realisá, dirèkt den kabes pa kaba ku bida di e tres hòmbernan aki.

Venezolanonan a atribuí e echo na dos presunto integrante di e grupo peligroso “Tren de Aragua”.

E hóbennan, kende a bebe alkohòl te den oranan di mainta, a intentá di hui entre e bashamentu di bala, pero no a logra. E kurpa nan sin bida a keda bentá den kurá di e lokal. Tur nan pertenensianan, tantu pèchi, sigaria, bòter, a keda tira na suela huntu ku e 14 hùls nan na e sitio.

Outoridatnan polisial Nashonal di Perú a tende algun testigu, kende nan a duna algun informashon den e kaso aki. A indiká ku lo sigui ku e investigashonnan pa di e forma aki purba yega na e responsabelnan.