SKALO—Momento a anotashonnan di traspaso ofisial di akshonnan Ansary a tuma lugá, dr. Emsley Tromp no tabata den maneho na Banko Sentral mas. Esei ta lokual dokumentashonnan ofisial riba anotashon di bolsa estado unidense ta indika.

Es mas, Emsley Tromp no ta riba niun dokumento ofisial ku mester a firma tantu na Ennia Caribe Holding komo na Banko Sentral, momento e traspasonan ofisial a tuma lugá. Ta trata di un grupo di alto funshonarionan kende a firma, na Ennia Caribe Holding i Banco di Caribe, pa e traspasonan por a tuma lugá. E nòmbernan menshoná den e dokumentashonnan, tampoko a bini dilanti na Korte.

Dokumentashon ofishal di e komishon nashonal estado unidense riba bolsa di invershon (United States Security and Exchange Comission) ta revelá algun informashon interesante ku tampoko no a presentá den korte. Entre yüni 2017 pa òktober 2017, Hushang Ansary a opta pa trese un kambio den su konstelashon di invershon. Pa por a logra esaki, tur direktor huntu ku nan apoderadonan den e konsorsio di Ennia, Banco Caribe na Kòrsou i Parman na Estádos Unídos mester a firma. Segun dokumentashon ofishal di e Komishon estado unidense ta trata di representantenan na Ennia Caribe Holding, EC Investments BV, Parman International BV, EC Investments International Sarl (Luxemburgo), Parman Capital Group LLC,  Parman Enterprises LLC, Kirby Corporation (USA). Den un di dos dokumentashon di kambio serka e grupo di invershon, mester a firma direktornan i representantenan di Parman, Ennia Caribe i tambe di Banco di Caribe huntu ku Banco di Caribe Investments BV.

Riba 13 di sèptèmber 2017, temporada ku Emsley Tromp a keda retirá na Banko Sentral, Hushang Ansary a raportá un tomo pasivo di 8.8% den Kirby Corporation. Kirby ta balorá na 4.2 bion dòler riba merkado di bolsa. I riba 6 di novèmber 2017 Reuters ta anunsiá  ku Ansary, un biaha mas ta raportá un tomo pasivo di 6.7% den Nabors Industries. Nabors ta balorá na 2.2 bion dòler. Remarkabel ta ku kontrali na Kirby, Stuart and Stevenson, Snapchat  i Mullet Bay, Nabor Utilities a keda kasi kompletamente for di e diskushonnan  di korte sivil. Esei durante tur tratamentu grandi di e kaso for di Yuli 2023. I tambe hasta te ku e veredikto na 2023. Unu di e nòmbernan ku a aparentá den e dokumentashonnan, ku no a keda menshoná den korte ta Ildefonds S., kende a firma pa Banco di Caribe plùs Banco di Caribe Investments. Entretantu e no ta na e banko mas.

Propietario i Presidente Ehekutivo di Parman Internashonal, kual kompania tambe ta propietario di Ennia Caribe Holding, Hushang Ansary a logra akapará por lo ménos 970 mion na akshon den e dos kompanianan menshon. Ámbos kompania ta registrá riba bolsa di balor na Estádos Unídos. Ta trata di Kirby Corporation i Nabors Industries.

Den korte sivil, Tromp a pèrdè tur claim tantu den promé instansha komo apelashon despues, unda korte a laga espasio pa interpretá ku e negligensia por tabata presentá durante di su maneho.