TUI tabatin diferente enkuentro eksitoso ku prensa último dianan.

Willemstad,– Kalkulashon di gerensia di TUI a determiná ku atraves di añanan TUI a logra trese mas ku 1 mion turista Kòrsou.

Segun añanan ta pasa e airolina TUI ta birando un dje kompanianan mas prominente ku ta trese turistanan Kòrsou. E kompania ku a kuminsá bula ruta Schiphol – Hato  solamente 2 biaha pa siman, aktualmente ta bulando e mesun ruta 14 biaha pa siman. Segun gerensia di TUI, nan kalkulashon nan a demonstrá ku ya e kompania a logra transportá mas ku 1 mion turista ku destinashon pa Kòrsou.

Arjan Kers, direcktor di TUI Hulanda, a splika ku aktualmente TUI Hulanda tin un flota di 10 avion kaminda 2400 persona ta laborá na e kompania.  Alabes e kompania ta bula na 60 diferente destinashon rònt mundu. Durante e presentashon tambe por nota ku den su totalidat TUI Hulanda ta sirbi 1.6 mion turista pa aña.

Tambe Kers a splika tokante TUI Hulanda ta kai bou di TUI Group kual tin 70 mil empleado i un flota di 150 avion. Banda di un flota di avion TUI Group ta manehá alrededor di 400 hotèl i 15 krusero. Ku e proyekto di “TUI Blue Curaçao” kaminda lo konstruí un hotèl den área di Santa Martha, TUI Group lo por konta ku mas hotèl bou di su maneho. Den e kaso di TUI Blue Curaçao famia empresario Vogels lo keda enkargá ku e maneho operashonal.

E siman aki TUI tabata diferente enkuentro interesante kaminda e kompania lo kontribuí na konstrukshon di e hotèlTUI Blue Curaçao na Santa Martha i mas aleu TUI lo invertí den vários portal pa karga outonan eléktriko.