E rèfri YDK, Danny Makkelie a regresá kas.

ALEMANIA—E kampionato oropeo di futbòl UEFA Euro2024, a kaba pa e rèfri Yu di Kòrsou, Danny Makkelie. Ta trata aki di rèfri kende ta dirigí den futbòl na Hulanda, unda ku e ta establesé i trahando komo un inspektor di polis.

Danny Makkelie ya a regresá kas i ta na tera friu, despues di a dirigí 2 wega, durante di e seri di weganan di grupo, pa loke ta e buèlta inisial di e torneo.

Dirigentenan enkargá ku arbitrahe pa e torneo a indiká na Makkelie, ku lo e no wòrdu asigná mas pa mira akshon. Esaki tabata meskos ku tabatin 8 selekshon nashonal di e 24 nan ku a partisipá, ku no a klasifiká pa e siguiente buèlta, Danny, tambe tabatin e mesun suerte den e rèfrinan. E tabata e úniko rèfri for di Hulanda, pa dirigí na Alemania.

Koleganan den arbitrahe i konosínan a keda sorprendé pa e desishon, ounke ku tabatin fanatikonan di entre otro Hungria i Kroasia ku si tabata di akuerdo ku e desishon, despues di desishonnan ku a keda tumá den nan respektivo weganan, dirigí pa Danny.

E federashon kroato, inkluso lo a entregá un protesta ofisial, kontra aktuashon di Danny Makkelie, despues di e wega entre nan ekipo i e selekshon di Italia, kual lo por ta e, òf un di e motibunan di su regreso trempan pa kas. Makkelie a dirigí tambe Alemania vs Hungria.

Durante di e kompetensia oropeo anterior, na aña 2021, kual tabata EK2020, ku a hunga un aña lat debí na pandemia, rèfri Danny Makkelie a logra yega pa dirigí te den semifinal, ora Inglatera i Dinamarka a lucha pa un puesto den final.