Willemstad, –Aktualmente boluntarionan ku interes tin e último siman pa inkribí  pa e akshon nashonal boluntario di CURA DOET. Inskripshon ta habri ainda pa esnan ku ke partisipá dia 15 i 16 di mart binidero.

E aña aki ta bira e di 11 edishon den kual CURA DOET ta organisá akshon boluntario kaminda un i tur ta keda invitá pa partisipá den mas ku 255 proyekto rònt Kòrsou. Ta buska un kantidat di mas ku 4000 boluntario pa yuda ku e proyektonan aki. E aña aki CURA DOET ta kolaborá huntu ku Curacao Cares i Oranje Fonds pa asina realisá e evento aki. Na 2022 CURA DOET a bini ku e tema “Ku otro, pa otro”. E enfoke tabata riba kiko nos por nifiká pa otro. Na 2023 diferente kas i grupo di grandi, manera Stichting Huize Tabita i Sentro di Aktividat 60+ a probechá di e dianan di e evento pa dal un keiru ku nan grandinan ku no tur ora ta haña oportunidat di sali i disfrutá.

Skolnan manera VSBO Sint Jozef i Emmy Berthold School a hasi uso di e oportunidat via boluntarionan di CURADOET pa drecha nan kura di skol, planta mata, fèrf materialnan di heru i pinta weganan riba plenchi di skol pa alumnonan. A skohe pa ofisialmente start e period nobo di CURA DOET pa mart 2024 huntu ku algun organisashonnan sosial. E aña aki tin diferente kas i grupo di grandi, manera Grupo Grandinan Maria Auxiliadora i Enkuentro Penshonadonan di Sta. Maria (EPDISAN) i nan lo probechá di e dia pa dal un paseo ku nan grandinan ku no tur ora ta haña oportunidat di sali i disfrutá òf ta organisá un mainta plasentero manera Grupo di Grandinan Troncon.

Tambe lo tin skolnan manera Nilda Pinto SBO, J.W.T Schotborgschool i Maris Stella College lo hasi uso di e oportunidat via boluntarionan di CURA DOET pa pinta i planta pa hasi skol mas bunita. CURA DOET ke hasi un último yamada na komunidat kompletu pa un biaha mas uni forsa pa por logra duna organisashonnan sosial e yudansa ku asina tantu nan mester di dje atraves di trabou boluntario. Durante e último dianan ku falta promé ku inskripshon sera, CURADOET ke stimulá un i tur pa inskribí, sea komo individual òf grupo. Ainda tin lugá pa mas boluntario partisipá. Tur organisashonnan sosial lo ofresé un T-shirt pa boluntarionan, tambe lo tin alimento i bebida.

Pero ta konsehá tur persona pa bin ku sunscreen, pèchi, bòter di awa pa protehá nan mes kontra kalor i solo. Por tuma kontakto na [email protected] òf na 788-1953 pa mas informashon òf yudansa pa inskribí. Bishitá www.curadoet.com pa tira un bista riba tur proyekto. Via e wèpsait por inskribí bo mes i skohe e proyekto den kual bo ke partisipá.