Sra Juliet Pablo di Unidat di Bario ta organisá workshop den kual diferente oradó ta duna presentashon di Palu di Famia.

Willemstad, — Djasabra último Unidat di Bario a organisá workshop ‘Palu di Famia’ den kuadro di abolishon di sklabitut, na Archivo Nashonal di Kòrsou.

Unidat di Bario ta selebrá 160 aña abolishon di sklabitut i ta hasi esaki tokante di Palu di Famia. Den dos workshop ta bai papia tokante di palu di famia. Esaki a sosodé riba 7 di òktober i riba 21 di òktober ta organisá un enkuentro mas na Archivo Nashonal. Den e promé workshop tabatin e oradónan: Dr. Rosemary Allen, Drs. Charles Do Rego, Sra. Modianne Cathalina, i Drs. Elgenia Pieternella. Sra Juliet Pablo di Unidat di Bario, a menshoná e workshopnan ta habrí pa tur hende ku registrá.

Den e promé workshop tabatin diferente persona ku tabata ke sa nan Palu di Famia. Sra Juliet Pablo di Unidat di Bario a menshoná ku ‘Palu di Famia’ ta un proseso den kual ta bai kolektá informashon. Sra Rosemary Ellen, antropólogo i dosente na UoC, a splika kon kulturalmente nos ta dil ku famia i kon ta kombersá yega na informashon hasiendo investigashon.  Rosemary a splika ku ta buska informashon adishonal di famia dor di kombersá ku un hende ku tin konosementu di e famia. Ta hasi esaki por medio di un kombersashon òf un entrevista  teniendo na kuenta kiko e meta di e kombersashon ta. Tambe Rosemary a splika kon ta hasi esaki i kiko ta e puntonan importante ku mester tene kuenta kuné ora hasi e investigashon òf tene e kombersashon.

Charles Do Rego a studia geografia sosial i tin un master den “business administration”. Sinembargo Do Rego ta konosí komo hefe di Kranshi i tambe su partisipashon den organisashon di elekshon. Dia 7 di òktober Do Rego a menshoná ku el a hasi hopi investigashon sosial i debí na esaki el a bin papia tokante di palu di famia. Sr Do Rego a papia tokante di palu di famia for di tempu kolonial te ku tempu di awor. Sra. Modianne Cathalina a splika tokante di e aspektonan tékniko di Archivo Nashonal i  kon ta buska den registro.

E detayenan di mas chikí por dirigí un famia den un direkshon pa asina e por haña sa di unda nan a bini. Esaki por ta informashon di por ehèmpel un karta skibí di ántes, informashon den korant, potrèt i tambe awor informashon ku ta wòrdu buta online. Tambe e informashon aki por enserá detayenan chikitu manera por ehèmpel unda un persona a traha , un persona su karakter, unda un persona tabata biba, i informashon ku ta pasa di generashon pa generashon den un famia. Tin famia ku ta buska informashon a base di nan fam kual esakinan por bai lidia nan bèk te na Oropa, Afrika, òf Latinoamérika.

Sra Juliet Pablo di Unidat di Bario a menshoná ku ora aña bòltu ta bai Kenepa pa bai wak orígen despues di abolisashon . Pa luna di mei otro aña, tur hende ku ta trahando riba nan palu di famia ta bai presentá esaki. Sra Juliet Pablo ta menshoná ku palu di famia ta yuda fortifiká famianan riba un forma ku famia ta bolbe topa otro, e ta parti di historia, e ta simbolisá patriotismo i e ta pone ku bo ta stima bo famia i bo pais hopi mas.