Sekretario di Estado pa Relashonnan di Reino i Digitalisashon Alexandra van Huffelen.

AMSTERDAM/WILLEMSTAD – Sekretario di Estado pa Relashonnan di Reino i Digitalisashon Alexandra van Huffelen a manda e státus tokante refinansiamentu dje fiansanan relashoná ku e pandemia Covid-19 será ku e paisnan den Karibe ayera pa Tweede Kamer.

El a enfatisá ku pa Kòrsou i St. Maarten e kondishon pa un interes abou, ta un akuerdo ku Hulanda tokante un solushon sólido i duradero pa e problema finansiero dje kompania di seguro di penshon Ennia, ku ta den un areglo di urgensia (noodregeling) na Banko Sentral di Kòrsou i Sint Maarten (CBCS) for di yüli 2018.

Manera primintí durante e debate tokante legislashon dia 27 di yüni último, Van Huffelen a informá e Parlamento hulandes tokante e situashon relashoná ku e refinansiamentu di e fiansanan pa Covid, despues di e reunion di 30 di yüni (na Sint Maarten) i dia 3 di yüli (na Kòrsou) i dia 4 di yüli (na Aruba) ku e respektivo paisnan.

“Mi a tin kòmbersashon ku e Promé Minister i un òf mas otro miembro di e gabinetenan di kada pais relashoná ku e refinansiamentu. Den e kòmbersashonnan mi a pone dilanti ku Hulanda ta ofresé kada pais refinansiamentu kompleto. Konseho di Ministronan di Reino a tuma un desishon aña pasá, ku mirando e grandura dje fiansanan i e rekuperashon nesesario di e situashon finansiero dje paisnan, no ta realístiko pa spera ku na fin di e término (dia 10 di òktober próksimo) ta posibel pa paga e fiansanan kompletamente.”

Segun Van Huffelen na Tweede Kamer, durante kada kòmbersashon a para ketu na e kondishonnan spesífiko pa kada pais ku Hulanda ta pone, pa refinansiamentu kontra interes abou, basá riba e interes ku Estado hulandes ta paga. “Banda di e kondishonnan pa kada pais, Hulanda ta eksigí tambe un kalkulashon independiente dje fiansa, pa yega na akuerdo tokante e areglonan finansiero, basá riba kapasidat di e pais respektivo. E kòmbersashonnan ku e gobièrnunan di e paisnan relashoná ku e refinansiamentu ainda no a kaba.”

Aruba
Pa Aruba, e kondishon pa interes abou ta introdukshon di un Lei di Reino pa supervishon finansiero. “Durante e kòmbersashon mi a menshoná ku solamente un Lei di Reino ta sufisiente pa Hulanda, pasó esaki ta e úniko instrumentu ku no por kambia unilateralmente. Gobièrnu di Aruba a indiká ku no tin konsenso (ainda) tokante un Lei di Reino i ta bai konsiderá e asuntu akí.”

Kòrsou i St. Maarten
Pa Kòrsou i St. Maarten, e kondishon pa un interes abou, ta un akuerdo ku Hulanda tokante un solushon sólido i duradero pa e problema finansiero dje kompania di seguro di penshon Ennia, ku ta den un areglo di urgensia (noodregeling) na Banko Sentral di Kòrsou i Sint Maarten (CBCS) for di yüli 2018. Ambos gobièrnu a indiká ku nan ta sinti e responsabilidat pa un solushon i ta asumí e responsabilidat akí tambe. “Keda sin tuma desishon lo tin konsekuensianan sosial grandi. Ta traha riba kolaborashon entre e partidonan embolbí, esta Kòrsou, St. Maarten i CBCS, ku ta e supervisor i direktiva aktual di Ennia. Entretantu a tuma lugá diferente reunion di ekspertonan. E meta di e trayekto akí ta pa yega na un akuerdo prinsipal (hoofdlijnenakkoord) riba término kòrtiku entre Kòrsou, St. Maarten, CBCS i Hulanda.”

Segun Van Huffelen si Hulanda no yega na un akuerdo ku e tres paisnan tokante e kondishonnan pa kada pais, e interes abou i e refinansiamentu riba término largu lo no ta disponibel mas. “E falta di un Lei di Reino òf un akuerdo tokante Ennia ta nifiká ku Hulanda ta konfrontá ku un oumento di rísiko riba e fiansanan akí. Aparte dje kondishonnan akí, den e kòmbersashonnan m’a papia tambe tokante e asina yamá “Meerjarig Economisch Kader” (e kuadro ekonómiko plurianual, esta di hopi aña). Mi intenshon ta pa forma e areglonan tokante refinansiamentu di tal manera ku nan tambe ta kontribuí na reforsá e ekonomia dje paisnan. Esaki por tuma lugá dor di brinda espasio den e refinansiamentu pa reforma i invershon, ku ta masha nesesario. Mi a stimulá e gobièrnunan dje paisnan pa presentá plannan konkreto mas pronto posibel, pa por atendé esakinan tambe durante e kòmbersashonnan. Un kalkulashon dje kuadro por ta tradusí den e modalidatnan di finansiamentu, ya e pais tin espasio pa invertí riba un término kòrtiku.”

Van Huffelen a enfatisá durante e kòmbersashonnan ademas ku tin ku bin klaridat pronto tokante e kondishonnan, pasó e fiansanan ta kaduká pa paga bèk dia 10 di òktober próksimo i, despues di yega na un akuerdo ku e paisnan tokante e refinansiamentu, Staten-Generaal ainda mester duna su aprobashon pa e kambionan di presupuesto relashoná ku esaki.