WILLEMSTAD – Sekretario di Estado pa Relashonnan di Reino Alexandra van Huffelen ta lamentá ku Kòrsou a disidí na último momentu pa desviá for di e akuerdo den konsepto ya será riba nivel atministrativo fo’i ougùstùs último, tokante un solushon pa e problemanan finansiero di kompania di seguro Ennia. Hulanda a proponé e asina yamá ‘concepthoofdlijnenakkoord’ komo kondishon pa haña un tipo di interes faborabel pa e refinansiamentu dje fiansanan di COVID.

Den e akuerdo ei a skohe un reinisio solvente di Ennia komo rumbo di solushon, i lo mester a realisá esaki pa medio di un inyekshon grandi di kapital di parti Kòrsou i St. Maarten. P’esaki e paisnan lo mester a hasi un fiansa di aproksimadamente 660 mion euro serka Hulanda. Sinembargo, gobièrnu di Kòrsou a informá Van Huffelen dia 5 di òktober numa di lo no opta pa un reinisio komo solushon, pero ku awó ta preferá un akuerdo kontrolá. Van Huffelen a informá Tweede Kamer djaluna último dje desaroyonan.

Segun Van Hufflen, na mei último el a pidi gobièrnu di Kòrsou pa organisá un enkuentro di ekspertonan pa diskutí posibel solushonnan pa e problemanan finansiero di Ennia. Den lunanan ku a sigui, yüli i ougùstùs, a tene basta enkuentro kaminda e ekspertonan a analisá e gastunan i riesgonan di e diferente opshonnan pa Ennia. A konsiderá un reinisio di Ennia ku un inyekshon di kapital for di gobièrnu komo finansieramente posibel, pero ku esaki lo no ta sin riesgonan.

Gobièrnunan di Kòrsou i St. Maarten a duna preferensia na un reinisio komo solushon pa Ennia, ku a kondusí na e ‘concepthoofdlijnenakkoord’ akordá riba nivel atministrativo for di na ougùstùs último. Hulanda tabata dispuesto pa sostené e akuerdo akí finansieramente. Sinembargo, tabatin preokupashonnan tokante e impakto ku un reinisio manera esaki lo tin riba presupuesto di Kòrsou, spesialmente relashoná ku e norma di interes (rentelastnorm) dje ‘Rijkswet financieel toezicht’ (Rft) ku Hulanda ta mantené.

E kolegio di supervishon finansiero CFT fo’i delantá a mustra riba e norma di interes, e sostenibilidat dje debe i e limitashon ku e norma lo tin den e próksimo añanan riba e posibilidat di sera mas fiansa pa invershonnan. E kalkulashon di Banko Sentral (CBCS) a mustra ku efektivamente lo eksedé e norma di interes, strobando plannan di invershon ku gobièrnu di Kòrsou lo no por implementá kompletamente. Van Huffelen ta bisa Tweede Kamer di no ta haña esaki deseabel pa e desaroyo ekonómiko di nos pais. Remarkabel ta sí ku promé ku gobièrnunan a ninga e fiansa grandi, Van Huffelen a bagatelisá e konseho di CFT den kontestanan por eskrito na Tweede Kamer, bisando ku esaki no ta realmente un ‘konseho’.

Fiansa Banko Sentral

Echo ta ku durante e último simannan, tur partner a eksplorá diferente opshon pa hasi un reinisio di Ennia posibel, sin sobrepasá e norma di interes i manteniendo e espasio di invershon. Esaki tabata inkluí adaptashon dje struktura di interes dje fiansa i uso di reservanan finansiero. Kòrsou a sugerí pa Hulanda finansiá un reinisio dunando fiansa na un otro partido manera Banko Sentral, e fondo di penshon di ámtenarnan òf un fondo di Ennia mes ku lo krea spesial pa e fiansa akí.

Sinembargo, Van Huffelen a rechasá e proposishon akí, pasó Hulanda no tabata deseá di bira un partner dirèkt den un asuntu interno dje paisnan i a preferá laga e responsabilidat den man dje paisnan mes. Na sèptèmber, Van Huffelen a splika e situashon na gobièrnu di Kòrsou i a insistí riba un akuerdo pronto tokante Ennia, ya ku e fecha di 10 di òktober 2023 tabata serka, loke tabata importante pa e refinansiamentu. Pero segun Van Huffelen, ta dia 5 di òktober numa el a sa via di prensa ku gobièrnu di Kòrsou a disidí di no aseptá un fiansa. Minister Presidente Gilmar Pisas a informá Van Huffelen mas despues por eskrito tokante e desishon akí. I dia 6 di òktober, gobièrnu di St. Maarten a notifiká ku nan tambe ta dispuesto pa koperá ku un akuerdo kontrolá.

Lat

Ounke Van Huffelen ta lamentá e desishon lat di Kòrsou di no sigui ku e reinisio, Hulanda no ta mira e akuerdo kontrolá komo algu negativo. Probablemente e gastunan di e opshon akí ta un tiki mas altu, pero e riesgonan ta mas chikí. Aktualmente ta trahando riba e manera kon lo ehekutá esaki, kaminda ekspertonan hulandes lo evaluá e enfoke pa mira si finansieramente e ta realista i sostenibel, pa asina sigurá ku interesnan di esnan ku tin pólisa ta protegé tambe riba término largu, i prevení problemanan sosial.

E refinansiamentu dje fiansanan pa COVID di Kòrsou i St. Maarten tabata dependé di un akuerdo tokante Ennia. Pasó no tin akuerdo, Hulanda ta ofresé awó fiansa riba término kòrtiku na lugá di refinansiamentu largu. Segun Van Huffelen, por konsiderá refinansiamentu largu atrobe ora tin akuerdo tokante e solushon kontrolá di Ennia, i ora Hulanda konstatá ku e ta finansieramente duradero.