Banko Sentral mester mantené sufisiente sèn efektivo den sirkulashon pa kubri tur e transakshonnan.

Willemstad,– E asosashon empresarial di Kòrsou, VBC, kier kita e diskushon tokante di e florin karibense for di polarisashon. Esaki ta dos kaso diferente, segun e empresarionan.

VBC ta mira e florin karibense komo un simpel kambia di nòmber, kual VBC ta bisa ku riba su mes no mester tin konsekuensia pa e balor di e florin òf pa e ekonomia di Kòrsou.

Banko Sentral a splika den detaye lokual mester hasi pa kambia e florin antiano pa e florin karibense. Sin bai den tur detaye tékniko, segun e empresarionan ta eksistí sufisiente motibu bálido i hopi importante pa kual e kambio aki mester tuma lugá riba término kòrtiku.

Banko Sentral mester mantené sufisiente sèn efektivo den sirkulashon pa kubri tur e transakshonnan. Spesialmente paso hopi transakshon na Kòrsou te ainda ta tuma lugá di forma efektivo. E moneda bieu ya no ta kumpli téknikamente mas ku e rekisitonan aktual di kalidat i seguridat ku mundu ta eksihi.

Un diskushon ekstenso tokante di e florin ta un “gepasseerd station” paso e desishon di e gobièrnu a keda tuma for di masha tempu, asina e empresarionan ta bisa.