Brievengat– Antillean Soap Company (ANSO) a risibí vehíkulonan nobo pa mehorá servisio pa kliente i entrega di produkto. E vehíkulonan ta resaltá pa nan aparensia kolorido, ku potrètnan di e produktonan di nos fábrika di habon lokal situá na Brievengat.

Na aña 2021 MetaCorp a kumpra Antillean Soap Company. Ku su tim di gerensia nobo e kambionan  a kuminsá bira riparabel: Tin un sistema di produkshon mas efisiente, mas surtido i mas benta di produktonan lokal di habon, detergente i otro produktonan di limpiesa. E empleadonan tabata e proménan ku a sinti e diferensia ku mehoransa di prosesonan i kambionan na e planta di produkshon. Klientenan lokal, usuarionan i rebendedónan ta eksperensiando e kambio den servisio i entrega di produktonan di ANSO. Segun Anthony Hollander, General Manager di e kompania: “Esaki ta lokual ku ta hasi nos grandi: Produktonan “best-in-class” mará na e mihó servisio pa klientenan”.

Den e último 45 aña, Antillean Soap Company a desaroyá di bira un nòmber hopi konosí den nos komunidat. Tin papiá ku probablemente den kada kas na Kòrsou mester tin mínimo un produkto di ANSO. Banda di su base fuerte na Kòrsou, ANSO orguyosamente ta eksportá su produktonan na 17 pais, kontribuyendo na nos ekonomia lokal ku empleo i ingreso di divisas.

Na Kòrsou e kompania MetaCorp, doño di ANSO, ta konosí pa su desaroyo di e área di Rif Fort i Renaissance Hotel. Ku e traspaso di su propietario i e tim di gerensia nobo, ANSO ta dunando un impulso pa su futuro ku ta mustra di ta mes kolorido ku su aparensia riba kaya.