Nicolas Maduro, presidente venezolano, kende a informá di e reunion ku Guyana.

CARACAS – E gobièrnu di Venezuela a anunsiá den oranan di djasabra tras di lomba, ku den e próksimo dianan lo tin un reunion di nivel haltu ku e Ehekutivo nan di Guyana. Esaki pa asina papia di e teritorio entre ámbos paisnan, atendiendo propuesta nan di e mandatario brasilero, Luiz Inacio Lula da Silva i e komunidat di Estádos Latinoamerikano i Caribe.

Den un komunikado, Caracas a informá di e kòmbersashonnan resiente di e presidente Nicolas Maduro ku Lula da Silva, meskos ku tambe e promé minister di St Vincent, Ralph Gonsalves i tambe e sekretario general di e Organisashon di Nashonnan Uní, Antonio Guterres.

Den e kòmbersashonnan aki, segun a keda indiká, a risibí e propuesta di realisá un reunion ku Guyana, ku lo keda anunsiá den e próksimo dianan. Esaki pa logra preservá aspirashon di mantené Amérika Latina i Karibe, un zona di pas, sin interferensia di aktornan eksterno.

Venezuela, ku den oranan di djadumingu siman pasá a aprobá den un referèndem unilateral, pa aneksá e zona, a asumí e konvokatoria pa ku e reunion aki.

Den e mesun nota publiká, ta señalá ku e kòmbersashonnan ku Lula da Silva i ku Gonsales, Maduro a indiká ku e ta firma riba su posishon históriko riba derechinan di Venezuela pa ku Esequiba, e área di kasi 160.000 kilometer kuadrá, kontrolá pa Georgetown.

Relashoná ku kòmbersashonnan di Guterres, e teksto ta indiká ku e sekretario general di ONU a komprometé su mes na impulsá esfuersonan na fabor di diálogo dirèkt entre e parti nan. Ademas a rekordá ku semper a ofresé su yudansa pa un solushon den e kontroversia aki.

E pleitu aki, ta for di 2018, den bista di atmishon di parti di Korte Internashonal di Hustisia, ku a pidi Venezuela pa no kompletá akshonnan ku por alterá dinámika aktual riba e área, atministrá pa Guyana.

Sinembargo, Maduro ta rechasá e mediashon di CIJ den e asuntu aki, un alegando ku tambe a keda reforsá pa resultado di e referèndem, den kua e venezolanonan a akordá di rekonosé e hurisdikshon di e tribunal internashonal, ku di tur forma, lo emití un desishon vinkulante pa e dos nashonnan den próksimo lunanan.