Konseho Sosio-ekonómiko (SER) ta entrega konseho riba implementashon di verlòf riba paternidat na Parlamento, riba petishon di frakshon MAN.

Willemstad,– Konseho Sosio-ekonómiko (SER) ta entregá konseho ku a ser pidí dor di frakshon MAN, riba implementashon di verlòf riba paternidat na Parlamento.

Dia 16 di aprel Konseho Sosio-ekonómiko di Kòrsou a entregá konseho tokante di un proposishon di inisiativa di lei pa implementashon di verlòf di paternidat. E inisiativa di lei aki a keda inisiá dor di frakshon MAN  i tin komo meta pa introdusí un areglo general di verlòf di paternidat di 5 dia di trabou pa tatanan ora nan yu nanse. Giselle Mc William ta bisa ku nos ta kan atras i hopi paisnan tin esaki regla kaba. E situashon aktual ta ku seka ámtenar tin verlòf di paternidat kaba pa alrededor di dos dia. Den sektor priva ta dependé di e doño ku ta duna verlòf na trahadónan. Verlòf na tatanan no ta regulá pa lei i mi ta kere ta importante pa hende hòmbernan tambe por ta huntu ku nan yu ku a nanse, voral den e promé dianan.

Tin investigashonnan ku ta mustra ku  e promé dianan di bida e yu, ta sumamente importante pa e yu ta den kontakto ku e tata tambe. Kontakto entre mama ku tata i yu ta importante. Banda di e  kontakto familiar, sosten di e tata tambe ta importante pa duna e mama, sigur den e promé siman Giselle ta splika. Esaki sigur ta un revolushon pa lokual nos ta bezig kuné den área di labor. Nos ta bezig ku penshun general pa trahadó i esaki ta kla kaba pa wòrdu atendé den reunion públiko na parlamento. Aruba ya a e introdusí esaki kaba 10 aña pasa i ta warda riba presidente di parlamento pa atendé e penshun  general pa trahadó.

Diskriminashon di edat di salario mínimo tin ku bai den komishon sentral ainda.  Tur esakinan ta importante pa nos trahadónan tambe por tin e  parti di apresio den nan labor i ku no ta vakantiedagen so ta importante, Giselle ta informá. E generashon aktual ta diferente for di esun promé i mester traha riba kondishonnan laboral sekundario di nos trahadónan i promové e parti di núkleo familiar. E petishon pa konseho a drenta lastu kuartal aña pasá seka  Konseho Sosio-ekonómiko. SER a investigá e tema di verlòf di paternidat den kual a hasi análisis, tambe komparashon ku otro paisnan i alabes konversashonnan ku diferente stakeholders.

E konseho di SER ta hunga un papel importante den e proseso di legislashon i tin komo meta pa informá e Parlamento tokante e posibel efektonan sosio-ekonómiko di e implementashon di e reglamentu deseá. E Konseho Sosio-ekonómiko a evaluá tur aspekto relevante di e proyekto di inisiativa di lei aki, inkluso e konsekuenshanan hurídiko i finansiero i e impakto sosio-ekonómiko. Adishonalmente, e konseho a hasi rekomendashonnan pa komuniká e kambionan pa informá tantu empleadonan komo empleadornan adekuatamente tokante e reglamentu nobo.

Según SER, e organisashon di konseho tripartito, e paso aki ta marká un desaroyo importante den e legislashon sosio-ekonómiko di Kòrsou, ku posibel efektonan largu plaso riba e merkado laboral i e komunidat.