UTRECHT—Volksbank no tin un sistema ku por determiná si klientenan ta partisipá den praktikanan kriminal.

Asina e banko no ta kontrola sufisiente si klientenan ta hasi maluso di monedanan crypto pa laba plaka. Internamente no ta muchu kla den kua risikonan mester bati alarma. Anteriormente e luna aki a bira konosí ku banko sentral hulandes DNB a manda atvertensia pa Volksbank pa reglanan anti-labamentu plaka defisiente. Ayera DNB a duna e detayenan. Tur kos ta drai rondó di un kuadro den kua e kompania prinsipal di SNS, ASN, Regiobank i BLG mester evalua klientenan, un sistema di analisis di integridat. Esaki mester inklui ki tipo di klientenan banko kier i kon ta atende ku nan. Esaki ta obligatorio pa klientenan ku ta inverti den monedanan crypto of ta transferi plaka pa paisnan di risiko.

Pero segun DNB tin falta di un analisis profundo pa haña mihó bista di klientenan ku ta forma un risiko haltu. Banda di esaki Volksbank no tin informashon presis e klientenan ta biba, kua produktonan i servisionan nan ta usa ni di unda nan plaka ta bini. E analisis di kliente no ta sufiente profundo segun DNB. No ta kla kua risikonan e banko ta kore ku plaka ku bankonan ta transferi pa paisnan dudoso ni kuantu kliente ta biba den e paisnan di risiko.  DNB a duna señal for di yuni 2022 ku Volksbank pa falta di kontrol di kliente no ta tene su mes na lei pa preveni labamentu di plaka i finansiamentu di terorismo. Despues di investigashon e banko a tende den mart ku segun DNB e ta viola lei. Na yuni Volksbank a haña un atvertensia ofisial, un instrukshon. Remarkabel ta ku Volksbank a puntra DNB pa no publiká e instrukshon. Esaki lo tin un impakto negativo riba reparashon segun e banko. Despues di e petishon di DNB a keda rechasa e banko mes a publika e instrukshon den su sifranan. Finalmente Volksbank no a hasi opheshon kontra e instrukshon segun un bosero a enfatisá. E banko ta referi na ekspreshonnan di direktor Gribnau ku a rekonose e defisiensianan i priminti pa hasi korekshon. Esaki mester ta prome ku 1 aprel segun DNB. Despues ta evalua si Volksbank ta haña un but. No solamente Volksbank pero tambe tres otro banko grandi (ING, ABN Amro i Rabobank) tin problemanan ku prevenshon di praktikanan di labamentu di plaka. Pa Volksbank e situashon ta mas delikado pa gobièrnu pasobra e banko ta kompletamente den man di estado. ABN Amro ta 50% den man di estado. Ayera bira konosi ku banko sentral Oropeo ECB a duna Volksbank un but pa falta di kontrol di transferensianan pa bankonan regional na Suisa. Pa esaki nan a haña un but di 4,5 mion euro. Volksbank a menshoná e violashon, ku e ta bisa e mes a meldu na ECB. E banko a hasi un reservashon pa un but i ya a paga ECB.