Den oranan di ayera, djadumingu, e votashonnan a tuma lugá.
BOGOTA – E skolnan elektoral di Colombia a habri nan portanan den oranan di ayera mainta 8or, pa elekshonnan lokal i regional, ku ta keda selebrá den un ambiente di tenshon pa un oumento di violensia polítiko.
Na e okashon aki, 38.9 mion di kolombiano lo por bai skohe 1.102 alkalde i 32 gobernadó, meskos ku tambe miembronan di konseho munisipal, di Asamblea Departamental i di e Hunta Atministrativo Lokal.
E urna nan a keda habrí durante ocho ora, te ku 4or di atardi i ta spera resultadonan bira konosí pronto.
E atenshon tabata poné, di un banda, den alkaldia nan di siudatnan grandi di e pais, manera Bogotá, Medellin i Barranquilla, unda segun e enkuestanan, e mayor intenshon di voto ta pa e kandidato nan kontrali di Petro.
E pais tambe ta pendiente di e situashon di òrdu públiko, deteriorá den e último lunanan pa vários faktor, entre nan e fuerte presensia di grupo nan armá ilegal, manera Estado Mayor Sentral, grupo prinsipal di FARC, ku ta difikultá yegada di material elektoral i di Ehérsito na algun zona di e departamento di Cauca.
Sinembargo, e echo mas grave di violensia a sosodé den oranan di djasabra tras di lomba na e departamento di Cesar, unda un atake kontra e sede lokal di Registraduria, a provoká morto di un trahadó i otro dos mas a resaltá heridá.
Segun e Ministerio di Interior, Luis Fernando Velasco, e atake a keda protagonisá pa un grupo di siudadano ku tabata protestá paso nan kandidato pa alkalde su kandidatura a keda anulá.
E grupo a sòru pa destrukshon di e Registraduria i despues a basha esaki ku gasolin, pega esaki na kandela i provoká e morto i heridonan ariba menshoná.