Willemstad – Lamentablemente, Ministerio di Tráfiko, Transporte i Planifikashon Urbano (VVRP) a konstatá ku den último dianan personanan ku ta laborá den sektor di transporte públiko a menasá ámtenarnan di Servisio pa Tráfiko i Transporte (UOVV). E personanan aki a bai asina leu di drenta den espasio privá di e ámtenar en kuestion menasando e pa loke ta trata atendementu di nan pèrmit.

Gobièrnu no ta tolerá esaki. E ámtenar a hasi denunsia na Polis pa e aktonan aki. VVRP ta indiká ku na momentu ku por konstatá ta ken ta e personanan ku a hasi nan mes kulpabel na e aktonan aki, lo bai na skòrs e personanan ei, i/òf kita nan pèrmit. Di e forma aki, e personanan aki lo no por sigui laborá den sektor di transporte públiko. Lo hasi esaki den estrecho koperashon ku Polis. E komportashon aki ta unu kompletamente inakseptabel.

VVRP ta duna un atvertensia serio kontra tipo di aktonan asinaki. Di awor en adelante, lo kita pèrmit di tur ku komportá di e forma baho aki.