Hensley Paulina

Brievengat—Tur kos a kuminsá pa Hensley Paulina den stadion Ergilio Hato. Den un entrevista ku Vigilante e mes ta bisa ku “tur kos a kuminsá akinan, mi struktura mi fundeshi tabata aki”.

For di chikí e la start ku atletismo den stadion Ergilio Hato, antes Sentro Deportivo Kòrsou i awor e ta kontentu di por ta bek riba su pais. Segun Paulina, for di chikitu e la kai bou di guia di e legendario entrenadó di atletismo, Wendell Prince. Prince tabata hiba Paulina ya ku su 15 aña Hulanda pa kompetí na nivel nashonal den su grupo di edat unda Paulina tabata sobresalí.

Wendel Prince a saka Paulina for di Ergilio Hato i mande ta na Papendal i Paulina mes ta bisa ku awe ainda e dosnan tin kontakto. “Wendell tabata manera un tata pami” e la deklará durante su entrevista ku Vigilante. E miembro di selekshon hulandes riba 100 200 i 4 x 100 meter riba pista tambe tin su mira riba e siguiente weganan olimpiko.

Hulanda na e momentonan aki tin un bon struktura den un kombinashon di atletanan hóben i esnan mas eksperensia manera Paulina i Churandy Martina. E idea ta pa pone un base pa dia e grupo mas veterano stòp e siguiente grupo por sigui ku e trayekto. Pa 2024, e selekshon tin algun “stòp” bon promé ku weganan olímpiko, manera e kampeonato mundial di Bahamas 4 i 5 di Mei próksimo, unda Hulanda lo buska su klasifikashon den tur kategoria di estafèt. Na Yuni tin e kampeonato Oropeo i di einan sigui bai Paris. E selekshon tin bastante tempu trahando huntu lokual ta hasi e tim hopi será ku otro i duna mihó prestashon.

Paulina tin 12 aña sin kore den stadion Ergilio Hato i riba 28 di Aprel próksimo e ta kore den e evento kuadrangular entre Hulanda, Bèlgika, Suisa i Ukraina. Paulina ta invitá pueblo di Kòrsou direkshon Ergilio Hato pa wak e karedanan.